कोपरगाव दि.२९ ( दिपक साटोटे)
कोपरगाव बसस्थानकातून नाशिककडे निघालेल्या एस.टी. बसमध्ये अचानक बिघाड झाल्यामुळे प्रवाशांना मोठ्या मानसिक त्रासाला सामोरे जावे लागले. या प्रकारानंतर काही प्रवाशांनी थेट कोपरगाव बस डेपो व्यवस्थापक अमोल बनकर यांची भेट घेऊन आपली कैफियत मांडली.
(दि.१९ ) मे रोजी नाशिककडे निघालेली बस खोपडी परिसरात अचानक बंद पडली. गाडीमधून मोठ्या प्रमाणात धूर निघू लागल्याने चालक व कंडक्टर यांनी गाडी थांबवली. त्यानंतर प्रवाशांना नाशिककडे जाणाऱ्या इतर बसमध्ये बसविण्याचा प्रयत्न केला गेला, मात्र त्या सर्वच बस भरलेल्या असल्यामुळे अनेक प्रवाशी तासभर अडकून पडले.
या बसमधून न्यायालयीन कामे, सरकारी दप्तरी व्यवहार, रुग्णालय व लग्न समारंभासाठी निघालेल्या प्रवाशांचा विशेष त्रास झाला. काही प्रवाशांनी तिकीटाचे पैसे परत मागितले, मात्र चालक व कंडक्टर यांनी “डेपो कार्यालयात संपर्क करा” असे सांगितले.
त्यानंतर प्रवाशांनी थेट डेपो व्यवस्थापक अमोल बनकर यांची भेट घेतली. त्यांनी संपूर्ण प्रकार समजून घेतला आणि चालकाकडूनही माहिती घेतली. परंतु, बस अचानक बिघडल्यामुळे पैसे परत दिले जाणार नसल्याचे त्यांनी स्पष्ट केले.
प्रवाशांनी यावर प्रश्न उपस्थित केला की, “प्रवासादरम्यान जर एखाद्याजवळ पैसे कमी असतील, तर तिकीट दिलं जात नाही. मग अशा प्रकारे बस बिघडली तर प्रवाशांचे नुकसान का भरून दिले जात नाही?” एका प्रवाशाने तर सांगितले की, “माझं हॉस्पिटलमध्ये अपॉईंटमेंट होतं, उशीर झाल्याने दंडही भरावा लागला.”
या तक्रारींच्या उत्तरादाखल व्यवस्थापक अमोल बनकर यांनी सांगितले की, “कोपरगाव डेपोकडे सध्या ७५ बस आहेत, त्यातील अनेक बस दुरुस्तीसाठी आहेत. डेपोकडे अद्याप १५ नवीन बस’ची आवश्यकता आहे. जुन्या बसमुळेच अशा अडचणी उद्भवतात. मात्र भविष्यात प्रवाशांना त्रास होणार नाही, यासाठी आम्ही योग्य ती काळजी घेऊ.”
