शाळेच्या सोयी–सुविधांवर सविस्तर चर्चा; युवकाकडून ५०० लिटर पाण्याची टाकी भेट
पैठण, दि.२५.( अभिजीत सोनवणे )
पैठण तालुक्यातील नांदर येथील जिल्हा परिषद प्राथमिक शाळा (शिवाजीनगर) येथे मंगळवार, दि.२५ नोव्हेंबर रोजी सकाळी ११ वाजता पालक मेळावा उत्साहात पार पडला. शाळेच्या प्रगतीसाठी आवश्यक असलेल्या विविध मुद्द्यांवर पालक, शिक्षक व ग्रामस्थांनी सविस्तर चर्चा केली.
मेळाव्यात शाळेतील लाईट समस्या, आवारात तार कंपाऊंडची गरज, विद्यार्थ्यांसाठी शुद्ध पिण्याच्या पाण्याची सोय अशा महत्त्वाच्या विषयांवर विचारमंथन झाले. पालकांच्या सूचना आणि शाळा व्यवस्थापनाचे निर्णय यामुळे मेळावा समाधानकारक वातावरणात संपन्न झाला.
या वेळी अध्यक्ष अजहर पठाण, उपाध्यक्ष जावेद शेख, सदस्य आज्जु शहा, कौसर पठाण, ईनुस कुरेशी, काकासाहेब वीर, मुख्याध्यापक सुपेकर सर, दिंडे सर, दुधे सर तसेच विद्यार्थी मोठ्या संख्येने उपस्थित होते.
मेळाव्याचे विशेष वैशिष्ट्य म्हणजे नांदर येथील २६ वर्षीय युवक काकासाहेब संभाजी काळे यांनी शाळेच्या विकासासाठी पुढाकार घेत ५०० लिटर क्षमतेची पाण्याची टाकी शाळेला भेट दिली. शालेय व्यवस्थापन समितीतर्फे त्यांचा सत्कार करून आभार मानण्यात आले.
समाजातील तरुणांनी शिक्षण आणि पायाभूत सुविधांसाठी अशा प्रकारे पुढे येणे ही सकारात्मक बाब असल्याचे उपस्थितांनी मत व्यक्त केले.
