कोपरगाव, दि.२१ : दिलीप गायकवाड
कोपरगाव नगरपरिषद संस्थानिक स्वराज्य निवडणुकीत प्रभाग क्रमांक ८ (सुभाषनगर) येथून सामाजिक कार्यकर्ता अर्जुन रघुनाथ मोरे यांनी यंदा अपक्ष उमेदवार म्हणून स्वबळावर उमेदवारी दाखल केली आहे. निवडणुकीच्या पार्श्वभूमीवर आज मोरे यांची भेट घेतली असता त्यांनी विभागात केलेल्या विविध सामाजिक उपक्रमांची माहिती दिली.
मोरे यांनी सांगितले की, “विभागातील नागरिकांकडून चांगला प्रतिसाद मिळत असून माझ्या उमेदवारीबाबत लोक आनंद व्यक्त करत आहेत. सामाजिक कामामुळे नागरिकांनी माझ्यावर विश्वास ठेवला आहे.”
मोरे यांनी मागील काही वर्षांत केलेल्या उल्लेखनीय सामाजिक उपक्रमांमध्ये; २०१६ मध्ये तीव्र उन्हाळ्यात टँकरद्वारे मोफत पाणीवाटप,रमजान महिन्यात मोफत ब्लॅंकेट वाटप,दिवाळीत गरजूंना मोफत फराळ वाटप,
कोरोना काळात छत्रपती शिवाजी महाराजांचा पोशाख परिधान करून सॅनिटायझर फवारणी,विनामूल्य मास्क वाटप,
साई कॉर्नर, बस स्टँड, दत्त पाडा, खंदक नाला व हनुमान मंदिर परिसरात अन्नदान, गीता प्रेसात्म शाळेला पाच खुर्च्यांची भेट, विद्यार्थ्यांना पेन्सिल, पेन, पुस्तके वाटप,२०२५ च्या विधानसभा निवडणुकीत मतदान केलेल्या नागरिकांसाठी ‘शाई दाखवा, नाश्ता करा’ हा उपक्रम,
अशा विविध कामांचा समावेश आहे.
महापुरुषांच्या जयंतीनिमित्त स्वच्छता मोहिमा, मदतकार्य अशा उपक्रमांमुळे नागरिकांमध्ये मोरे यांची वेगळी ओळख निर्माण झाली आहे. “नागरिकांनी माझ्या सामाजिक कामाला मान्यता देत मतदानाचा विश्वास दिल्यास विभागातील अनेक प्रलंबित प्रश्न सोडवण्याचे प्रयत्न करणार आहे,” असे मोरे यांनी भेटीदरम्यान सांगितले.यावेळी अनिल जाधव उपस्थित होते.
