पैठण, दि. ३१ ( अभिजित सोनवणे )
शिवाजी नागरी सहकारी बँक लि., पैठण या प्रतिष्ठित बँकेला 2024-25 या आर्थिक वर्षासाठी ‘बेस्ट अर्बन को-ऑपरेटिव्ह बँक’ पुरस्काराने गौरवण्यात आले आहे. ‘भारत को-ऑप समिट ॲण्ड अवॉर्ड्स 2025’ मुंबई यांच्या वतीने देण्यात येणाऱ्या ‘भारत रत्न सहकारिता सन्मान 2025’ अंतर्गत हा पुरस्कार प्रदान करण्यात आला.
या पुरस्कार वितरण सोहळ्याचे आयोजन नुकतेच मुंबईतील हॉटेल ललित येथे पार पडले. या सोहळ्यात प्रमुख पाहुणे म्हणून सुमनेष जोशी (आयटीएस, डेप्युटी डायरेक्टर जनरल, कम्युनिकेशन आणि आयटी मंत्रालय, भारत सरकार), प्रभात चतुर्वेदी (सीईओ, नॅपकॅब), तसेच आशिष श्रीवास्तव आणि अनुपम गुप्ता (को-फाउंडर व डायरेक्टर) यांनी उपस्थित राहून पुरस्कार प्रदान केला.
या गौरवाच्या क्षणी बँकेचे चेअरमन रविंद्र शिवाजीराव काळे, वॉइस चेअरमन भाऊसाहेब औटे, संचालक शामसुंदर लोहीया, मुख्य कार्यकारी अधिकारी ई.आय. पठाण आणि जी.व्ही. म्हस्के यांची उपस्थिती होती.
हा पुरस्कार मिळाल्याबद्दल बँकेच्या कार्यक्षम व्यवस्थापनाची आणि सामाजिक बांधिलकीची सर्वत्र प्रशंसा होत असून पैठणच्या सहकार चळवळीला मोठे यश लाभले आहे.
