ॲड.अशोक वहाडणे यांनी दिली कामाच्या प्रगतीची माहिती….
कोपरगाव, दि. ११ ( दिलीप गायकवाड )
कोपरगाव कोर्ट वकील असोसिएशनचे अध्यक्ष ॲड. अशोक वहाडणे यांच्या नेतृत्वाखाली वकील असोसिएशनच्या सदस्यांनी सध्या निर्माणाधीन असलेल्या कोपरगाव न्यायालयाच्या नवीन इमारतीची पाहणी केली.
पाहणीदरम्यान अध्यक्ष ॲड. अशोक वहाडणे यांनी माहिती देताना सांगितले की, “सदर इमारतीचे बांधकाम वेगाने सुरू असून, चार मजली भव्य इमारत दीड ते दोन वर्षांत पूर्ण होण्याची अपेक्षा आहे. या नवीन इमारतीत वकिलांसाठी स्वतंत्र बार रूम, प्रशस्त पार्किंगची व्यवस्था, तसेच अग्निशमन, पाणी व वीज यांचे सुसज्ज नियोजन करण्यात आले आहे.”
त्यांनी पुढे सांगितले की, “जिल्हा न्यायालय वगळता इतर सर्व न्यायालयीन कामकाज यथास्थित सुरू राहणार आहे. याशिवाय, परिसरात पूर्वी असलेले मारुती मंदिर नव्याने उभारण्यात येणार आहे, ज्यामुळे धार्मिक श्रद्धा कायम राहील आणि वकिलांमध्ये समाधानाचे वातावरण आहे.”
या पाहणी दौऱ्यात माजी अध्यक्ष ॲड. येवले, ॲड.टूपके , ॲड. धोरडे, ॲड. शेख आर.जे., ॲड. गुजर, ॲड. भिडे आदी मान्यवर वकील सहभागी झाले होते.
तसेच, सहकार न्यायालयासाठी दहा गुंठे जागा उपलब्ध असून, भविष्यात त्या ठिकाणी देखील भव्य इमारतीचे नियोजन असल्याचे ॲड. वहाडणे यांनी यावेळी सांगितले. त्यांनी विश्वास व्यक्त केला की, या सर्व प्रकल्पांमुळे वकिलांसह सर्वसामान्य नागरिकांना उत्तम सुविधा लाभणार आहेत.
