मुंबई, दि.३० ( प्रतिनिधी )
प्रवाशांना दर्जेदार व आधुनिक सेवा उपलब्ध करून देण्यासाठी राज्य शासन प्रयत्नशील आहे. त्याचाच एक भाग म्हणून इवे ट्रान्स प्रा. लि. या कंपनीकडून महाराष्ट्र राज्य मार्ग परिवहन महामंडळासाठी ५१५० ईलेक्ट्रीक बसेस भाडेतत्त्वावर घेण्याचा करार करण्यात आला आहे. या करारानुसार, कंपनीने सुधारित वेळापत्रकानुसार उर्वरित बसेसचा पुरवठा करावा, असे निर्देश परिवहन मंत्री प्रताप सरनाईक यांनी दिले.
मंत्रालयात आयोजित आढावा बैठकीत, सरनाईक बोलत होते. या वेळी अपर मुख्य सचिव संजय सेठी, महामंडळाचे व्यवस्थापकीय संचालक डॉ. माधव कुसेकर आणि कंपनीचे प्रतिनिधी के. व्ही. प्रदीप उपस्थित होते.
परिवहन मंत्री, सरनाईक यांनी सांगितले की, “कंपनीने दिलेल्या वेळापत्रकानुसार बस पुरवठा करणे अपेक्षित आहे. तसेच, चालनीय तोट्याच्या पार्श्वभूमीवर व्यवहार्यता अंतर अर्थपुरवठा (Viability Gap Funding) मिळवण्यासाठी राज्य शासनाकडे प्रस्ताव पाठवावा.”
आत्तापर्यंत कंपनीने २२० ई-बसेसचा पुरवठा केला असून उर्वरित बस सुधारित करारानुसार देण्यात याव्यात, असेही ते म्हणाले.
माध्यमांशी बोलताना, सरनाईक यांनी सांगितले की, “५१५० बसेसपैकी १२ मीटर आणि ९ मीटर लांबीच्या २२० बसेस मिळाल्या आहेत. महामंडळाने यासाठी स्वतंत्र उत्पन्न खाते तयार केले असून, यामधून कंपनीला ६० कोटी रुपये दिले आहेत. आणखी ४० कोटी रुपये लवकरच दिले जाणार आहेत.”
तसेच, महामंडळाला बस संचालनामध्ये होणारा तोटा देखील लक्षात घेऊन, पुढील काही वर्षांत सुमारे ३१९१ कोटी रुपयांचा तोटा सहन करावा लागणार असल्याचे श्री. सरनाईक यांनी नमूद केले.
या पार्श्वभूमीवर मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांच्यासोबत लवकरच बैठक घेऊन पुढील निर्णय घेण्यात येईल, अशी माहितीही त्यांनी दिली.
