मुंबई, दि.६ ( प्रतिनिधी )
महाराष्ट्र राज्य मार्ग परिवहन महामंडळाच्या ताब्यात असलेल्या विविध शहरांतील बसस्थानक व आगार परिसरातील जागांचा पब्लीक प्रायव्हेट पार्टनरशीप (PPP) पद्धतीने विकास करून महामंडळासाठी उत्पन्नाचे नवे स्त्रोत निर्माण करावेत, अशा सूचन परिवहन मंत्री प्रताप सरनाईक यांनी आज दिल्या.
एस.टी. महामंडळाच्या मध्यवर्ती कार्यालयातील सभागृहात पार पडलेल्या बैठकीत त्यांनी हे निर्देश दिले. या बैठकीस महामंडळाचे महाव्यवस्थापक (स्थापत्य) दिनेश महाजन, वास्तुविशारद लहीवाल यांच्यासह इतर अधिकारी उपस्थित होते.
परिवहन मंत्री सरनाईक म्हणाले की, एसटीच्या मालकीच्या जागांचा विकास करताना स्थानिक गरजा, बाजारातील संभाव्यता व व्यावसायिक दृष्टिकोन लक्षात घेणे आवश्यक आहे. या जागांचे ‘अ’, ‘ब’ आणि ‘क’ असे वर्गीकरण करून त्यांचे पॅकेज तयार करावे, ज्यामध्ये शहरी, निमशहरी व ग्रामीण भागातील जागांचा समावेश असावा.
राज्यात एकूण ७२ पॅकेजेस तयार करण्यात येणार असून, त्यात बसस्थानके, आगारे व इतर मालमत्तांचा समावेश राहील. प्रत्येक पॅकेजमध्ये मालमत्तेचे मूल्य स्पष्ट करण्यात येईल आणि आवश्यक असल्यास सुधारणा करून कार्यवाही करण्यात यावी, असेही त्यांनी स्पष्ट केले.
या विकास प्रकल्पाला गती देत तातडीने अंमलबजावणी करण्याचे निर्देश देत मंत्री सरनाईक यांनी महामंडळाला उत्पन्नवाढीच्या दिशेने पावले उचलण्याचे स्पष्ट संकेत दिले.
