मुंबई, दि.११ ( प्रतिनिधी )
छत्रपती संभाजीनगर जिल्ह्यातील ऐतिहासिक आणि अध्यात्मिकदृष्ट्या महत्त्वाच्या असलेल्या पैठण शहराचा पर्यटनदृष्ट्या सर्वांगीण विकास करण्यासाठी पायाभूत सुविधा विकसित करण्यात याव्यात, असे निर्देश पर्यटन मंत्री शंभूराज देसाई यांनी दिले आहेत. पैठणच्या विकास आराखड्याविषयी मंत्रालयात पार पडलेल्या बैठकीत ते बोलत होते.
या बैठकीस पर्यटन राज्यमंत्री इंद्रनील नाईक, खासदार संदीपान भुमरे, आमदार रत्नाकर गुट्टे, माजी आमदार विलास भुमरे, पर्यटन विभागाचे प्रधान सचिव अतुल पाटणे, पर्यटन महामंडळाचे व्यवस्थापकीय संचालक मनोजकुमार सुर्यवंशी तसेच दूरदृश्यप्रणालीद्वारे जिल्हाधिकारी दिलीप स्वामी आणि सार्वजनिक बांधकाम विभागाचे राजेंद्र बोरकर उपस्थित होते.
मंत्री शंभूराज देसाई यांनी सांगितले की, पैठण हे संत एकनाथ, संत ज्ञानेश्वर, संत चांगदेव महाराज यांसारख्या संतांचे निवासस्थान असल्याने त्याला खास अध्यात्मिक ओळख आहे. याशिवाय प्रसिद्ध पैठणी साडीमुळे हे शहर सांस्कृतिक व आर्थिकदृष्ट्याही महत्त्वाचे आहे. त्यामुळे येथे येणाऱ्या भाविक व पर्यटकांच्या सोयीसाठी पायाभूत सुविधा निर्माण करणे अत्यंत गरजेचे आहे.
या विकास आराखड्यात घाटांचा विकास, भक्त निवास, स्थानिक संस्कृती व हस्तकलेचा प्रचार, संत एकनाथ मंदिर परिसरातील रोषणाई, जांभुळवन, दक्षिण काशी मैदान, आपेगावचा समावेश करण्यात यावा, असे त्यांनी सूचित केले.
