कुणी घर देता का घर? बिल्डरांना ‘संक्रमण शिबिरा’साठी म्हाडाचे आवाहन!
मुंबई, दि. १३ ( मंगेश म्हात्रे )
“कुणी घर देता का घर?” – नटसम्राट सिनेमातील या भावस्पर्शी संवादाप्रमाणेच, आज ही साद खुद्द म्हाडाकडून आली आहे. म्हाडाच्या आरआर मंडळाने धोकादायक उपकरप्राप्त इमारतींतील रहिवाशांसाठी तात्पुरत्या निवासाच्या (संक्रमण शिबिर) व्यवस्था करण्यासाठी मुंबईतील बिल्डरांना आपली घरे भाडेतत्वावर उपलब्ध करून देण्याचे आवाहन केले आहे.
या निर्णयामुळे अशा धोकादायक इमारतींमध्ये राहणाऱ्या नागरिकांना सुरक्षित, सुसज्ज आणि तात्पुरते निवासस्थान मिळण्याचा मार्ग मोकळा होणार आहे. उपमुख्य अधिकारी उमेश वाघ यांनी दिलेल्या माहितीनुसार, इच्छुक विकासकांनी खालील अटी आणि शर्तींनुसार आपले प्रस्ताव सादर करावेत,असे आवाहन त्यांनी केले आहे.
यानुसार सदनिका अधिकृत आणि कायदेशीर दस्तावेजासह असाव्यात.प्रत्येक सदनिका किमान २२५ ते २७५ चौरस फुटांची असावी.स्वतंत्र बाथरूम आणि शौचालयाची सुविधा आवश्यक.कार्यक्षम वीज आणि जलपुरवठा असावा.चार मजल्यांहून अधिक इमारतीसाठी लिफ्ट अनिवार्य.पार्किंगची सोय आवश्यक आणि कोणतेही थकीत देयक नसावे.भाडेकरार किमान दोन वर्षांचा असेल. दरवाढ व कालावधी वाढीचा निर्णय म्हाडा घेईल.कोणतीही पूर्वसूचना देऊन म्हाडा करार रद्द करू शकते.प्रस्तावात या अटी व शर्ती आहेत.
इच्छुक बिल्डरांनी आपले प्रस्ताव उपमुख्य अधिकारी (संक्रमण गाळे),म्हाडा यांच्याकडे सादर करावेत,असे आवाहन म्हाडातर्फे करण्यात आले आहे.
