५७२ बाधित कुटुंबांच्या पुनर्वसनसाठी एमएमआरडीएकडून तीन पर्यायांची घोषणा…
ठाणे, दि.१५ ( प्रतिनिधी )
मुंबई महानगर प्रदेश विकास प्राधिकरणाच्या (एमएमआरडीए) महत्त्वाकांक्षी बोरिवली-मागाठाणे ते ठाणे (टिकुजिनीवाडी) या दरम्यानच्या दुहेरी भुयारी रस्ता प्रकल्पासाठी भूमिगत कामे वेगाने सुरू असून, प्रकल्पामुळे बाधित होणाऱ्या कुटुंबांच्या पुनर्वसन प्रक्रियेला आता गती देण्यात आली आहे.
मागाठाणे परिसरातील रूपवते नगर, मिलिंद नगर, फरलेवाडी, एसआरए प्रकल्प आणि रस्त्यालगत फूटपाथवर वास्तव्यास असलेल्या अंदाजे ५७२ झोपड्यांचे पुनर्वसन आवश्यक ठरत आहे. या पार्श्वभूमीवर एमएमआरडीएने तीन पर्यायांची पुनर्वसन योजना जाहीर केली असून, प्रकल्पग्रस्तांनी आपली पसंती लेखी स्वरूपात सादर करावी, असे आवाहन करण्यात आले आहे.
१, आर्थिक मोबदल एमएमआरडीएच्या धोरणानुसार, बाधित झोपड्यांच्या क्षेत्रफळाच्या प्रमाणात नगदी मोबदला देण्यात येणार आहे. हा मोबदला थेट संबंधित लाभार्थ्यांच्या खात्यात जमा केला जाईल.
२,स्थायी निवास प्रकल्पग्रस्तांना बोरीवली इंटिग्रेटेड वसाहत तसेच मीरा-भाईंदर येथील रेंटल हाऊसिंग प्रकल्पामधील सदनिका प्रदान केल्या जातील. या सदनिका मे. गुजरात व सोनम इंटरप्राईजेस यांनी बांधल्या असून, नागरिकांच्या मागणीनुसार कायमस्वरूपी स्वरूपात देण्यात येणार आहेत.
३,एसआरए प्रकल्पामार्फत पुनर्वसन झोपडपट्टी पुनर्वसन प्राधिकरणाच्या माध्यमातून मे. भारद्वाज विकसक यांच्यामार्फत राबवण्यात येणाऱ्या पुनर्वसन प्रकल्पात प्रकल्पग्रस्तांना त्यांच्या मूळ स्थळीच नवीन सदनिका दिल्या जातील. या कालावधीत तात्पुरत्या स्वरूपात सदनिकांची अथवा भाड्याची सोय करण्यात येईल.
एमएमआरडीएने स्पष्ट केले आहे की, वरील तीन पर्यायांपैकी निवड करून तत्काळ लेखी अर्ज सादर करणे आवश्यक आहे. अर्ज प्राप्त झाल्यानंतरच कायदेशीर आणि प्रशासकीय प्रक्रियेस गती मिळेलअर्ज सादर करताना अथवा अधिक माहितीकरिता उपजिल्हाधिकारी रोहिणी आखाडे (022-26597494) यांच्याशी संपर्क साधावा, असे आवाहन करण्यात आले आहे.हा प्रकल्प मुंबईच्या उत्तर आणि मध्य उपनगरांना ठाणेशी जलद व सुगम कनेक्टिव्हिटी प्रदान करणार असून, वाहतूककोंडी, प्रदूषण आणि प्रवासाचा कालावधी कमी करण्याच्या दृष्टीने मैलाचा दगड ठरेल, अशी आशा व्यक्त होत आहे.
