म्हाडा अतिधोकादायक इमारतीतील रहिवाश्यांना २०,००० रुपये भाडे देणार
मुंबई, दि.३ ( प्रतिनिधी )
पावसाळ्याच्या पार्श्वभूमीवर मुंबईतील ९६ अतिधोकादायक इमारतींतील रहिवाशांच्या सुरक्षेसाठी म्हाडाने एक महत्त्वपूर्ण निर्णय घेतला आहे. या इमारतीतील रहिवाशांनी स्वतःहून पर्यायी वास्तव्याची व्यवस्था केल्यास त्यांना दरमहा २०,००० भाडे ‘म्हाडा’मार्फत दिले जाणार आहे. हा निर्णय म्हाडाचे उपाध्यक्ष संजीव जयस्वाल यांनी जाहीर केला.
मुंबई इमारत दुरुस्ती व पुनर्रचना मंडळाच्या पावसाळापूर्व सर्वेक्षणात ९६ इमारती अतिधोकादायक ठरवण्यात आल्या असून, यामध्ये सुमारे २४०० रहिवासी वास्तव्य करत आहेत. मंडळाकडे सध्या फक्त ७८६ संक्रमण गाळे उपलब्ध
असल्यामुळे उर्वरित रहिवाशांना तात्काळ स्थलांतरित करणे शक्य नाही. त्यामुळे सुरक्षेच्या दृष्टीने त्यांनी स्वतंत्रपणे केलेल्या राहण्याच्या व्यवस्थेसाठी दरमहा आर्थिक मदत देण्याचा निर्णय घेण्यात आला आहे.
याचबरोबर, मंडळाला १८० ते २५० चौ. फूट आकाराचे ४०० गाळे तीन वर्षांसाठी भाड्याने घेण्याची जाहिरात प्रसिद्ध करण्याचे निर्देशही 8 जयस्वाल यांनी दिले आहेत. हे गाळे अतिधोकादायक इमारतीतील रहिवाशांना तात्पुरत्या निवासासाठी वापरले जाणार आहेत.सदर निर्णयांतर्गत जेव्हा सदर इमारतींच्या जागेवर विकासकांकडून पुनर्विकास होईल, तेव्हा मंडळाने केलेल्या भाडेभरणा किंवा गाळे भाड्याने घेण्याचा संपूर्ण खर्च विकासक किंवा संबंधित सहकारी गृहनिर्माण संस्थेने भरणे बंधनकारक राहील, असेही स्पष्ट करण्यात आले आहे.
मुंबई शहरात सध्या १३,०९१ उपकरप्राप्त इमारती अस्तित्वात आहेत आणि मंडळाकडे २०,५९१ संक्रमण गाळ्यांची उपलब्धता आहे. ही व्यवस्था धोकादायक किंवा दुरुस्तीच्या गरजेतील इमारतीतील रहिवाशांसाठी केली जाते.
म्हाडाचा हा निर्णय नागरिकांच्या सुरक्षिततेसाठी महत्त्वाचा ठरणार असून, अतिधोकादायक इमारतींमधून रहिवाशांचे लवकरात लवकर स्थलांतर करण्यासाठी उपयुक्त ठरेल.
