मुंबई, दि.१७ : मंगेश म्हात्रे
एल्फिन्स्टन ब्रीजवरील पी- ६१ आणि पी – ६१ ए ‘ या पिअर स्थानांवर सुरू असलेल्या पाइलिंग कामाला गुरुवारी स्थानिक रहिवाशांनी विरोध करत तात्पुरता अडथळा आणला. दिनांक १३ नोव्हेंबर २०२५ पर्यंत या ठिकाणी सात पाइल्सचे काम पूर्ण झाले असले तरी सुमारे ५० स्थानिकांनी अचानक येत पाइलिंग थांबवले. परिसरातील इमारती तब्बल १०० वर्षे जुनी असल्याने कंपनांमुळे इमारतींना धोका पोहोचू शकतो, अशी भीती त्यांनी व्यक्त केली.
या पार्श्वभूमीवर एमएमआरडीएकडून कंत्राटदारामार्फत व्हीजेटीआय.च्या तज्ञांची नियुक्ती करण्यात आली आहे. इमारतींची संरचनात्मक सुरक्षितता तपासण्यासाठी अॅक्सेलरोमीटर, क्रॅक विड्थ गेजेस आणि टिल्ट सेन्सर्ससारखी उपकरणे संबंधित इमारतींवर बसविण्यात आली असून कंपन, भेगा आणि कलन यांचे मोजमाप तांत्रिक पद्धतीने सुरू आहे. या चाचण्या कशा राबवल्या जात आहेत याची माहिती स्थानिकांना देण्यात आली.
स्थानिकांच्या विनंतीवरून १४ नोव्हेंबर रोजी एमएमआरडीए अधिकारी, व्हीजेटीआय.चे तज्ञ प्राध्यापक आणि प्रकल्प सल्लागार यांनी प्रत्यक्ष स्थळाला भेट देत संयुक्त पाहणी केली. या वेळी तज्ञांनी पाइलिंगदरम्यान इमारतींसाठी कोणत्या सुरक्षा उपाययोजना केल्या जात आहेत याचे स्पष्टीकरण दिले. तसेच पाइल बोरिंगदरम्यान हार्ड रॉकमध्ये सॉकेटिंग करताना रिग मशीनचा वेग कमी ठेवणे, ऑगरमधून चिखल बाहेर काढताना ध्वनी पातळी मर्यादित ठेवणे आणि कंपनांचे सातत्याने निरीक्षण करणे अशा सूचनाही कंत्राटदाराला दिल्या.
एमएमआरडीएने रहिवाशांच्या सुरक्षेला प्राधान्य देत कामावर बारीक लक्ष ठेवण्याचे आश्वासन दिले आहे.
