शिवसेना शिंदे गटातून पूजा रामदास कांबळे रिंगणात?
मुंबई, दि.१७ : मंगेश म्हात्रे
सायन प्रतीक्षानगर वॉर्ड क्रमांक १७३ महिलांसाठी राखीव घोषित झाल्यानंतर स्थानिक राजकारणातील घडामोडीना वेग आला असून असून भाजप, शिवसेना (ठाकरे गट ) आणि शिवसेना (शिंदे गट ) गटांमध्ये उमेदवारीसाठी जोरदार मोर्चेबांधणी सुरु झाली आहे. विशेष म्हणजे शिवसेना शिंदे गटातून माजी नगरसेवक रामदास कांबळे यांच्या पत्नी पूजा रामदास कांबळे रिंगणात उतरण्याची दाट शक्यता व्यक्त केली जात असून, खात्रीलायक सूत्रांकडून मिळालेल्या या माहितीनंतर वॉर्ड १७३ मध्ये नवा राजकीय ट्विस्ट पाहायला मिळत आहे.
सायन-कोळीवाडा विधानसभा प्रमुख दशरथ पवार यांच्या फेसबुक पोस्टमुळे आधीच चर्चा तापल्या असताना शिंदे गटातील हालचालींना आता अधिक वेग आला आहे. पवार यांनी त्यांच्या सुन निकिता पवार यांच्या उमेदवारीसाठी आग्रही भूमिका घेतल्याची चर्चा आहे. त्याचबरोबर शाखा संघटीका वैजयंती घाडगे याही इच्छुक असून, या तिघींच्या स्पर्धेमुळे शिवसेना शिंदे गटात चुरस तीव्र झाली आहे.
२०१८ च्या पोटनिवडणुकीत याच वॉर्डातून विजय मिळवलेल्या रामदास कांबळे यांच्या पत्नी पूजा कांबळेंचे नाव पुढे येताच समीकरणे बदलण्याची शक्यता वर्तवली जात आहे. विशेष म्हणजे २०२४ च्या विधानसभा निवडणुकीत भाजपा आमदार कॅप्टन तमिळ सेल्वन यांना या वॉर्डातून तब्बल ४८०० मतांची आघाडी मिळाली होती. त्यामुळे भाजपचा या वॉर्डातील प्रभावदेखील लक्षणीय आहे.
आगामी महापालिका निवडणुकीत शिंदे गटाच्या उमेदवाराबाबत स्पर्धा निर्माण झाली असून भाजपसोबत युती होणार की स्वबळावरची लढत, याकडे सर्वांचे लक्ष लागले आहे. ठाकरे गटाकडूनही येथे तगडे आव्हान उभे राहू शकते. शिवसेना–मनसे युती झाल्यास मराठी मतांचे समीकरण बदलू शकते, असे राजकीय जाणकारांचे मत आहे.
स्थानिक पातळीवरील अंतर्गत स्पर्धेमुळे निवडणूक अधिक रंगतदार होणार हे निश्चित असून, वॉर्ड १७३ मध्ये शिवसेना शिंदे गटाची उमेदवारी अखेर कोणाच्या वाट्याला जाणार? याबाबत उत्सुकता शिगेला पोहोचली आहे.
