पोलीस ठाण्यात निवेदन देत कठोर कारवाईची मागणी
वडवणी, दि.२० : (प्रतिनिधी )
त्र्यंबकेश्वर (जि. नाशिक) येथील पत्रकार योगेश खरे, किरण ताजने, अभिजीत सोनवणे व इतर पत्रकारांवर झालेल्या भ्याड हल्ल्याचा निषेध व्यक्त करत वडवणी तालुक्यातील पत्रकारांनी एकत्र येत तीव्र आवाज उठविला. या पार्श्वभूमीवर मराठी पत्रकार परिषद वडवणी शाखा, डिजिटल मीडिया परिषद तसेच हल्ला विरोधी कृती समिती यांच्या वतीने वडवणी पोलीस ठाण्यात निवेदन देण्यात आले.
पत्रकारांवर वारंवार होणारे हल्ले चिंताजनक असल्याचे नमूद करत, हल्लेखोरांवर कठोर कारवाई करावी अशी मागणी निवेदनाद्वारे करण्यात आली. पत्रकारांच्या सुरक्षिततेबाबत प्रशासनाने ठोस उपाययोजना कराव्यात, असेही यावेळी सांगण्यात आले.
या वेळी मराठी पत्रकार परिषदेचे तालुका अध्यक्ष सतीश सोनवणे, ज्येष्ठ पत्रकार सुधाकर पोटभरे, डिजिटल मीडिया तालुकाध्यक्ष ओमप्रकाश साबळे, संपादक ज्ञानेश्वर लंगे, पत्रकार महेश सदरे, धम्मपाल डावरे, वाजेद पठाण, गीतांजली लव्हाळे, संभाजी लांडे, राम चौरे, हर्षद उंडाळकर, अतुल जाधव आदींसह अनेक पत्रकार मोठ्या संख्येने उपस्थित होते.
पत्रकारांवर होत असलेल्या हल्ल्यांचा निषेध नोंदवत, दोषींना तातडीने अटक करून कठोर शिक्षा देण्यात यावी, अन्यथा तीव्र आंदोलनाचा इशारा पत्रकार संघटनांनी दिला आहे.
