मुंबई -मंगेश म्हात्रे
म्हाडाच्या २६४० घरांसाठी अर्ज करणाऱ्यांनी या सोडतीला अर्जदारांनी कमाल प्रतिसाद दिला असून, आता तब्बल ७८ हजार ९७६ अर्ज दाखल झाले आहेत. त्यापैकी ५५ हजारांहून अधिक अर्जदारांनी अनामत रक्कम भरून आपला सहभाग निश्चित केला आहे. लक्षात घेण्याजोगी बाब म्हणजे म्हाडाच्या एका घरासाठी सरासरी 30 अर्ज आले आहेत. अर्ज नोंदणी प्रक्रियेची अंतिम तारीख २८ मे २०२६ रात्री ११.५९ वाजेपर्यंत असल्यामुळं आता अर्जांची संख्या आणखी वाढणार असल्यामुळं म्हाडाची ही सोडत लाखाचा टप्पा पार करेल असा अंदाज नोंदवला जात आहे.
यंदाच्या सोडतीत विक्रोळी पूर्व येथील कन्नमवार नगर प्रकल्प विशेष चर्चेत असून, येथील १२२१ सदनिकांचा समावेश करण्यात आला आहे. विशेष म्हणजे, या प्रकल्पातील घरांच्या किंमतीत ७.५ टक्क्यांची कपात करण्यात आली असून प्रत्येक घरासोबत मोफत वाहनतळ देण्याची घोषणाही म्हाडाने केली आहे. त्यामुळे उच्च उत्पन्न गटातील नागरिकांकडून या प्रकल्पाला मोठी पसंती मिळत आहे.
पूर्वी १.३४ कोटी ते १.३७ कोटी रुपयांदरम्यान असलेल्या सदनिकांचे दर कमी करण्यात आल्याने इच्छुकांना मोठा दिलासा मिळाला आहे. आता अर्जदारांना २९ मेपर्यंत अनामत रक्कम ऑनलाइन किंवा RTGS/NEFT द्वारे भरता येणार आहे.
कधी जाहीर होणार अंतिम यादी?
अर्जांची प्रारूप यादी १० जून रोजी प्रसिद्ध होणार असून, अंतिम यादी १६ जूनला जाहीर करण्यात येणार आहे. सोडतीची तारीख आणि वेळ नंतर जाहीर केली जाणार असल्याचे मंडळाने स्पष्ट केले आहे. म्हाडाच्या या सोडतीकडे मुंबईकरांचे लक्ष लागले आहे.
