मुंबई : अजय मगरे
महाराष्ट्रात रिक्षा, टॅक्सी तसेच ॲपआधारित प्रवासी वाहने चालविणाऱ्या अमराठी चालकांना व्यावहारिक मराठी शिकण्यासाठी १८ ऑगस्ट २०२७पर्यंत अंतिम मुदतवाढ देण्यात आली आहे. ही स्थगिती म्हणजे नियम रद्द झाल्याचा अर्थ नसून, या कालावधीचा उपयोग मराठी भाषा शिकण्यासाठी करावा, असे आवाहन परिवहन मंत्री प्रताप सरनाईक यांनी केले.
‘महाराष्ट्र माझा! मराठी माझी संवाद भाषा!’ अभियानाच्या पुढील टप्प्याच्या नियोजनासाठी सरनाईक यांच्या अध्यक्षतेखाली मंत्रालयात बैठक झाली. महाराष्ट्रात व्यवसाय करताना प्रवाशांशी दैनंदिन व्यवहारासाठी मराठीत संवाद साधता येणे आवश्यक असल्याचे त्यांनी स्पष्ट केले.
१ लाख ६५ हजारांहून अधिक चालकांना प्रशिक्षण
परिवहन विभाग, मराठी भाषा विभाग आणि कोकण मराठी साहित्य परिषद यांच्या संयुक्त विद्यमाने राबविण्यात येणाऱ्या **‘हिंदुहृदयसम्राट बाळासाहेब ठाकरे मराठी संवाद भाषा अभियान’**च्या पहिल्या टप्प्यात राज्यभरात १८० हून अधिक प्रशिक्षण केंद्रे सुरू करण्यात आली. सुमारे १,८०० शिक्षकांच्या माध्यमातून १ लाख ६५ हजार ८०० हून अधिक अमराठी चालकांना व्यावहारिक मराठीचे प्रशिक्षण देण्यात आले आहे.
राज्यात सुमारे ९ लाख ७८ हजार रिक्षा व टॅक्सी चालक कार्यरत आहेत. यामध्ये सुमारे ९ लाख १६ हजार ऑटोरिक्षा चालक आणि ६१ हजार टॅक्सी चालकांचा समावेश आहे. मुंबई महानगर प्रदेशात ४ लाख ४० हजार २३८ रिक्षाचालक आणि ४३ हजार १०६ टॅक्सीचालक आहेत.
ऑनलाइन प्रशिक्षणाचीही सुविधा
अद्याप मोठ्या संख्येने अमराठी चालक व्यावहारिक मराठी प्रशिक्षणापासून दूर असल्याने अभियानाचा दुसरा टप्पा अधिक व्यापक स्वरूपात राबविण्यात येणार आहे. प्रशिक्षण केंद्रांसोबतच ऑनलाइन माध्यमातूनही व्यावहारिक मराठी शिकण्याची सुविधा उपलब्ध करून देण्यात येणार असल्याची माहिती सरनाईक यांनी दिली.
“स्थगितीचा कालावधी मराठी शिकण्यापासून दूर राहण्यासाठी नसून स्वतःला तयार करण्याची संधी आहे. प्रत्येक अमराठी चालकाने मराठी संवाद भाषा अभियानात सहभागी होऊन व्यावहारिक मराठी आत्मसात करावी. प्रवाशांशी त्यांच्या भाषेत संवाद साधल्याने प्रवास अधिक सुलभ आणि आपुलकीचा होईल,” असे सरनाईक यांनी सांगितले.
आरटीओंना प्रशिक्षण केंद्रांसाठी समन्वयाचे निर्देश
चालकांना प्रशिक्षणासाठी स्थानिक शाळा अथवा उपलब्ध जागांचा वापर करावा. स्थानिक लोकप्रतिनिधींच्या सहकार्याने मोठ्या संख्येने चालकांना प्रशिक्षण उपलब्ध करून देण्यासाठी आवश्यक समन्वय साधावा, असे निर्देश प्रादेशिक परिवहन अधिकाऱ्यांना देण्यात आले.
१८ ऑगस्ट २०२७नंतर व्यावहारिक मराठीसंदर्भातील नियमांची काटेकोर अंमलबजावणी होणार असल्याने चालकांनी आतापासूनच प्रशिक्षण पूर्ण करून घ्यावे, असे आवाहन परिवहन विभागाकडून करण्यात आले आहे.
