ऐरोलीत बाराचाकी ट्रक पकडला; ४८ हजार मद्याच्या बाटल्यांसह १.३० कोटींचा मुद्देमाल जप्त
ठाणे : अजय मगरे
परराज्यातून महाराष्ट्रात अवैध मद्याची वाहतूक करणाऱ्या बाराचाकी ट्रकवर राज्य उत्पादन शुल्क विभागाच्या कोकण विभागीय भरारी पथकाने ऐरोली येथे धडक कारवाई केली. या कारवाईत गोवा निर्मित ‘रॉयल ब्ल्यू माल्ट व्हिस्की’च्या ४८ हजार बाटल्या आणि ट्रक असा एकूण १ कोटी ३० लाख ६० हजार रुपयांचा मुद्देमाल जप्त करण्यात आला. याप्रकरणी जावेदखान नवाबखान पिंजारी (२४) याला अटक करण्यात आली आहे.
बेलापूर-ठाणे मार्गावरून अवैध मद्याची वाहतूक होणार असल्याची माहिती मिळाल्यानंतर भरारी पथकाने ऐरोली रेल्वेस्थानकासमोर सापळा रचला. यावेळी संशयित टाटा ट्रक अडवून तपासणी केली असता, साबणाचे बॉक्स असल्याचे सांगण्यात आलेल्या खोक्यांमध्ये मद्याच्या बाटल्या आढळल्या. एक हजार बॉक्समध्ये १८० मिली क्षमतेच्या ४८ हजार बाटल्या होत्या. या मद्याची महाराष्ट्रात विक्री करण्यास बंदी असून, बाटल्यांवर बॅच क्रमांक आणि कमाल किरकोळ किंमतही नमूद नसल्याचे तपासात आढळले.
या प्रकरणी महाराष्ट्र दारूबंदी कायद्यान्वये गुन्हा दाखल करण्यात आला आहे. निरीक्षक दिगंबर शेवाळे यांच्या मार्गदर्शनाखाली ही कारवाई करण्यात आली. दुय्यम निरीक्षक एच. बी. यादव पुढील तपास करीत आहेत.
