मुंबई उपनगर जिल्हा दिव्यांग सक्षमीकरण अधिकाऱ्यांचे आवाहन…
मुंबई, दि. १७ : अजय मगरे
दिव्यांग व अव्यंग व्यक्तींमध्ये विवाहाला प्रोत्साहन देण्यासाठी राबविण्यात येणाऱ्या दिव्यांग–अव्यंग विवाह प्रोत्साहन योजनेअंतर्गत पात्र जोडप्यांना अर्थसहाय्य उपलब्ध करून देण्यात येते. या योजनेचा लाभ घेऊ इच्छिणाऱ्या जोडप्यांनी नियमानुसार अर्ज दाखल करावेत, असे आवाहन मुंबई उपनगर जिल्हा दिव्यांग सक्षमीकरण अधिकाऱ्यांनी केले आहे.
या योजनेसाठी अर्ज करताना विवाह नोंदणी दाखला, वर-वधू यांची शाळा सोडल्याची प्रमाणपत्रे, वर अथवा वधू यांचे दिव्यांगत्व प्रमाणपत्र, लग्नातील एकत्रित छायाचित्र, दोन प्रतिष्ठित व्यक्तींची शिफारसपत्रे, महाराष्ट्र अधिवास प्रमाणपत्र, तसेच वर-वधूचे पोस्ट ऑफिस किंवा राष्ट्रीयकृत बँकेतील संयुक्त खात्याचे पासबुकची छायांकित प्रत अशी कागदपत्रे जोडणे आवश्यक आहे.
इच्छुकांनी अर्जासाठी जिल्हा दिव्यांग सक्षमीकरण अधिकारी, मुंबई उपनगर, प्रशासकीय इमारत, चौथा मजला, आर.सी. मार्ग, चेंबूर (पूर्व), मुंबई–७१ येथे संपर्क साधावा. अर्जाचे नमुने संबंधित कार्यालयात उपलब्ध असून, पात्र लाभार्थ्यांनी या योजनेचा लाभ घ्यावा, असे प्रसिद्धीपत्रकात म्हटले आहे.
