मुंबई, दि.२४ : मंगेश म्हात्रे
सायन प्रतिक्षानगर म्हाडा संक्रमण शिबिरातील टी-३६, टी-३७, टी-५३ आणि टी-५४ या इमारती धोकादायक असून ‘गाळे तात्काळ रिकामी’ करण्याचा फ्लेक्सद्वारे जाहीर केल्यानंतर परिसरात संतापाची लाट उसळली आहे.
या फ्लेक्समध्ये आयआयटी पवईचा द्वारे या इमारतींचा स्ट्रचरल ऑडिटचा करण्यात आल्याचा उल्लेख करण्यात आला असून या इमारती राहण्यासाठी धोकादायक असल्याचे फ्लेक्समध्ये नमूद करण्यात आले आहे.
अचानक आणि कोणतीही पूर्वसूचना न देता अशा प्रकारचे फ्लेक्स लावून म्हाडाने रहिवाश्यांवर “बिल्डिंग रिकामी करा” असा दबाव टाकत असल्याचा आरोप करण्यात येत आहे.
रहिवाशांच्या मते, इमारती धोकादायक असल्याचे सांगत म्हाडाने फ्लेक्सवरून तात्काळ गाळे रिकामे करण्याचे आवाहन केले असले तरी प्रत्यक्षात स्थलांतराची कोणतीही पारदर्शक प्रक्रिया, योग्य बैठक, लेखी हमी किंवा संवाद साधला गेलेला नाही. त्यातच फ्लेक्सवर दिलेले पर्याय ; संक्रमण शिबिरातील गाळे किंवा २० हजार रुपये प्रतिमहिना भाडे , हे अपुरे, अव्यवहार्य आणि रहिवाशांच्या संख्येच्या तुलनेत अत्यंत कमी असल्याची भावना रहिवाशांनी व्यक्त केली.
म्हाडाने प्रथम सर्वसमावेशक बैठक घेऊन, पुनर्विकासाचा आराखडा स्पष्ट करून, तात्पुरत्या निवासाची हमी व वेळापत्रक द्यायला हवे होते. लावण्यात आलेला फ्लेक्स “अन्यायकारक व असंवेदनशील” असल्याची प्रतिक्रिया भाजप मंडळ अध्यक्ष दत्ता केळूसकर यांनी दिली आहे.
“आमच्या सुरक्षेची काळजी आहे की पुनर्विकासाचा बहाणा करून आम्हाला बेघर करण्याचा डाव?
म्हाडाने फ्लेक्स लावून जबरदस्तीचा संदेश दिला आहे. चर्चा न करता उघड्यावर अशा नोटीससारखा बोर्ड लावणे म्हणजे धमकावणेच,” अशी प्रतिक्रिया प्रतिक्षानगर संक्रमण शिबीर पुनर्वसन कृती समिती सचिव लवू नर यांनी दिली आहे.
रहिवाश्यांनी म्हाडाला मागणी केली आहे की, अचानक फ्लेक्स लावून लोकांमध्ये भीती निर्माण करणे थांबवावे.पुनर्विकासाची अधिकृत माहिती, दस्तऐवज, वेळापत्रक व हमीपत्र द्यावे.
प्रत्यक्ष सर्वसामान्यांशी चर्चा करून लोकशाही पद्धतीने निर्णय घ्यावा.दरम्यान म्हाडाच्या निर्णयाविरोधात रहिवाश्यांनी एकजुटीने पुढील आंदोलनाची तयारी सुरू केली आहे.
