नोंदणी २७ नोव्हेंबरपासून सुरू
मुंबई : दि. २६ : मंगेश म्हात्रे
म्हाडाच्या मुंबई गृहनिर्माण व क्षेत्रविकास मंडळातर्फे विविध प्रकल्प परिसरातील तब्बल ८४ अनिवासी गाळ्यांच्या विक्रीसाठी ई-लिलाव प्रक्रिया सुरू करण्यात येत आहे. या लिलावासाठी ऑनलाईन नोंदणी व अर्ज प्रक्रिया २७ नोव्हेंबर रोजी सकाळी ११ वाजता सुरू होणार असून २१ डिसेंबर, रात्री ११.५९ वाजेपर्यंत अर्ज करता येणार आहेत.
लिलावासाठी उपलब्ध गाळे मुंबईतील मुलुंड गव्हाणपाडा (४), कुर्ला स्वदेशी मिल (५), कोपरी पवई (१५), मजासवाडी जोगेश्वरी (१), सिद्धार्थनगर गोरेगाव (१), बिंबिसार नगर गोरेगाव पूर्व (१७), मालवणी मालाड (२९) आणि चारकोप (१२) या ठिकाणी उपलब्ध आहेत.
ई-लिलाव २३ डिसेंबर रोजी सकाळी ११ ते सायंकाळी ५ दरम्यान www.eauction.mhada.gov.in
या संकेतस्थळावर होणार असून २४ डिसेंबर, सकाळी ११ वाजता लिलावाचा एकत्रित निकाल mhada.gov.in आणि eauction.mhada.gov.in या संकेतस्थळांवर जाहीर केला जाईल.
ई-लिलावात सहभागी होण्यासाठी अर्जदाराचे वय किमान १८ वर्षे असणे आवश्यक आहे. तसेच २०१८ नंतरचे महाराष्ट्र अधिवास प्रमाणपत्र आणि संबंधित गाळ्यानुसार ठरविलेली अनामत रक्कम ऑनलाईन भरावी लागणार आहे.
लिलावाचे पात्रता निकष, गाळ्यांची माहिती, सामाजिक आरक्षण, अर्ज प्रक्रिया, अटी-शर्ती आणि माहितीपुस्तिका या दोन्ही संकेतस्थळांवर उपलब्ध असून अर्ज करण्यापूर्वी सर्व तपशील काळजीपूर्वक वाचावेत, असे आवाहन म्हाडातर्फे करण्यात आले आहे.
