सायन प्रतीक्षा नगर प्रभाग १७३ मध्ये सहा महिला इच्छुक; भाजपमध्ये उमेदवारीसाठी चुरस
मुंबई, दि.२९ : मंगेश म्हात्रे
आगामी महापालिका निवडणुकीत सायन–कोळीवाडा विधानसभा क्षेत्रातील प्रभाग क्र. १७३ वर भाजपचा विशेष फोकस दिसत आहे. शनिवारी झालेल्या मुलाखत फेरीत या प्रभागातून तब्बल सहा महिला उमेदवारांनी इच्छुक म्हणून हजेरी लावल्याने राजकीय वर्तुळात चर्चांना उधाण आले आहे.
चेंबूरमधील भाजप कार्यालयात झालेल्या या मुलाखत प्रक्रियेत अंजली दास, वैशाली पगारे, शिल्पा केळूसकर, अर्चना जाधव, आरती निजापकर आणि मेघा जोरीगिल यांनी सहभाग घेतल्याची माहिती सूत्रांनी दिली. सायन विधानसभा क्षेत्रातील सर्व प्रभागांमधून आलेल्या इच्छुकांचे काम, स्थानिक नेटवर्क आणि मतदारांमधील संपर्काची पाहणी निरीक्षकांकडून करण्यात आली. या मुलाखतींना आमदार पराग आळवणी तसेच भालचंद्र शिरसाठ उपस्थित होते, अशी माहिती सूत्रांकडून मिळाली आहे.
अनपेक्षित दावेदारीमुळे प्रभागात राजकीय खळबळ…
आरती निजापकर आणि मेघा जोरीगिल यांच्या अचानक झालेल्या दावेदारीने भाजपच्याच गोटात खळबळ माजली असून अनेकांच्या भुवया उंचावल्या आहेत. दोघीही स्थानिक स्तरावर भाजप महिला मोर्चामध्ये सक्रिय आहेत. त्यामुळे या प्रभागात महिला पदाधिकाऱ्यांमध्येच चुरस निर्माण झाली आहे.
प्रभाग १७३ मध्ये परंपरागत जातीय–वर्गीय समीकरणे आणि स्थानिक तक्रार–विकास प्रश्नांमुळे उमेदवाराची निवड नेहमीच कठीण मानली जाते. त्यामुळे सहा महिला उमेदवारांनी उमेदवारीसाठी दाखवलेली उत्सुकता ही भाजपच्या अंतर्गत समीकरणांची नव्याने मांडणी असल्याचे राजकीय विश्लेषकांचे मत आहे.
