सुनेच्या उमेदवारीसाठी दशरथ पवारांची मोर्चेबांधणी…
मुंबई, दि. २ : मंगेश म्हात्रे
शिवसेना शिंदे गटाचे सायन-कोळीवाडा विधानसभाप्रमुख दशरथ पवार यांनी यंदाच्या महापालिका निवडणुकीत सून निकिता पवार यांना उमेदवारी मिळावी, यासाठी जोरदार मोर्चेबांधणी सुरू केली आहे. प्रभाग क्र. १७३ हा महायुतीमध्ये कोणाकडे जाणार याबाबत अद्याप निर्णय झाला नसला, तरी पवार यांनी दोन वेळा माजी खासदार राहुल शेवाळे यांची उमेदवारीसाठी भेट घेतली आहे.
दांडगा जनसंपर्क असलेला कार्यकर्ते म्हणून ओळख असलेल्या पवार यांनी सांगितले, “मी पक्षासाठी आजवर मनापासून काम केले. २०२२ मधील प्रतिकूल परिस्थितीतही मी झोकून दिलं. सायन कोळीवाड्यात शिवसेनेच्या विस्तारात माझे मोलाचे योगदान आहे. त्यामुळे पक्ष माझ्यावर अन्याय करणार नाही, अशी मला खात्री आहे.”
ते पुढे म्हणाले, “ माजी खासदार राहुल शेवाळे यांच्यासारख्या मार्गदर्शकांचे मार्गदर्शन मला लाभले. त्यांच्यामुळेच सायन कोळीवाडा विधानसभा क्षेत्रात मोठ्या प्रमाणात काम करण्याची संधी मिळाली आणि कार्यकर्त्यांसाठी काहीतरी करू शकलो, याचा मला आनंद आहे. न्याय मिळेपर्यंत मी स्वस्थ बसणार नाही.”
सुनेसाठी उमेदवारीचा आग्रह आणि पवार यांचा लढाऊ पवित्रा यामुळे प्रभाग १७३ मध्ये राजकीय वातावरण ढवळून निघालं असून महायुतीतील जागावाटपाच्या चर्चांनाही वेग आला आहे.
