कोपरगाव,दि.१५. ( दिलीप गायकवाड )
कोपरगाव तालुक्यातील जेऊर कुंभारी येथील प्रगतिशील शेतकरी राजेंद्र गिरमे यांनी आपल्या ३ एकर आंबा बागेत ड्रोनच्या साह्याने औषध फवारणी करून आधुनिक शेतीचा नवा आदर्श निर्माण केला आहे. उंच व मोठ्या फळझाडांवर पारंपरिक पद्धतीने फवारणी करणे कठीण जात असताना ड्रोन तंत्रज्ञानामुळे हे काम अल्पावधीत आणि अचूकरीत्या पूर्ण झाले.
नैसर्गिक दूषित हवामान, कीड व रोगराईमुळे आंबा झाडांच्या पानांवर, मोहरावर किंवा फळांवर रोग आल्यास फवारणी करणे शेतकऱ्यांसाठी जिकिरीचे ठरते. मात्र आधुनिक ड्रोन तंत्रज्ञानामुळे कमी वेळेत, कमी खर्चात आणि योग्य प्रमाणात औषध फवारणी शक्य झाली आहे. यामुळे मजुरी खर्चात बचत होऊन पिकांचे संरक्षण अधिक प्रभावीपणे होत असल्याचे गिरमे यांनी सांगितले.
या प्रात्यक्षिकावेळी संजय तुकाराम होले (मामा), कोपरगाव उपस्थित होते. त्यांनी ड्रोन फवारणीची प्रत्यक्ष पाहणी करून माहिती संकलित केली. ही माहिती बहुजन शक्ती न्यूज चॅनेल ला देण्यात आली.
ड्रोनच्या माध्यमातून शेतीत नवतंत्रज्ञानाचा वापर वाढत असून, ही पद्धत इतर शेतकऱ्यांसाठीही प्रेरणादायी ठरत आहे. आधुनिक तंत्रज्ञान स्वीकारल्यास शेती अधिक कार्यक्षम व फायदेशीर होऊ शकते, असा विश्वास यावेळी व्यक्त करण्यात आला.
