ठाणे : अजय मगरे
स्थानिक पातळीवर मराठी भाषेचा वापर वाढवण्यासाठी शिवसेना तर्फे जय भवानी नगर येथे मराठी भाषा वर्गांचा अभिनव उपक्रम सुरू करण्यात आला आहे. या उपक्रमामुळे विशेषतः रिक्षा व टॅक्सी चालकांना दैनंदिन व्यवहारात मराठीत संवाद साधणे अधिक सोपे होणार आहे.
या वर्गांचे आयोजन माजी नगरसेवक एकनाथ भोईर तसेच महाराष्ट्र सचिव राम रेपाळे यांच्या पुढाकारातून करण्यात आले आहे.
मराठी भाषा जपणे आणि तिचा वापर सर्वसामान्यांमध्ये वाढवणे हा या उपक्रमाचा मुख्य उद्देश असून, विशेषतः सेवा क्षेत्रात काम करणाऱ्या चालकांसाठी हा उपक्रम महत्त्वाचा ठरणार आहे.
या वर्गांमध्ये मराठी वाचन, लेखन आणि संभाषण कौशल्यावर भर दिला जाणार आहे. त्यामुळे प्रवाशांशी अधिक प्रभावी संवाद साधता येईल, असा विश्वास व्यक्त केला जात आहे.
या उपक्रमाचे स्थानिक नागरिकांनी स्वागत केले असून, अधिकाधिक रिक्षा-टॅक्सी चालक तसेच युवकांनी सहभागी व्हावे, असे आवाहन आयोजकांनी केले आहे.
