मुख्याध्यापिका सौ. आशा तेलंगे मॅडम यांचा सेवापूर्ती गौरव सोहळा उत्साहात संपन्न
ठाणे, दि. २७ (अजय मगरे)
ठाणे महानगरपालिका शाळा क्र. १३० च्या मुख्याध्यापिका सौ. आशा मदन तेलंगे मॅडम या २८ फेब्रुवारी रोजी सेवानिवृत्त झाल्याने त्यांचा भव्य गौरव सोहळा काजूवाडीतील ठामपा शाळा क्र.१३० च्या मैदानात मोठ्या उत्साहात पार पडला.
92972434-b510-4980-9edc-64873abdbe29
या सोहळ्याला ठाणे महानगरपालिका उपायुक्त ( शिक्षण ) सचिन सांगळे प्रमुख पाहुणे म्हणून उपस्थित होते. आपल्या मनोगतात त्यांनी सौ. आशा तेलंगे यांच्या शिक्षण क्षेत्रातील योगदानाचे कौतुक करताना सांगितले की, “सौ. आशा तेलंगे यांनी आपल्या कार्यकाळात विद्यार्थ्यांसाठी नावीन्यपूर्ण उपक्रम राबवून त्यांना गुणवत्तापूर्ण शिक्षण देण्यास सर्वोत्तम प्रयत्न केले. त्यांची कर्तव्यनिष्ठा आणि शिक्षण क्षेत्रातील समर्पण सर्वांसाठी प्रेरणादायी आहे.”
कार्यक्रमात विद्यार्थ्यांनी गीतगायन, आणि भाषणांच्या माध्यमातून आपल्या प्रिय शिक्षिकेबद्दल कृतज्ञता व्यक्त केली. शाळेतील सहकारी शिक्षक आणि शिक्षिका यांनी देखील त्यांच्या सहवासातील अनुभव कथन करत मॅडमच्या नेतृत्वगुणांचे आणि मार्गदर्शनाचे कौतुक केले.
कार्यक्रमाच्या शेवटी सौ. आशा तेलंगे मॅडम यांनी आपल्या भावना व्यक्त करत “शिक्षक हा केवळ व्यवसाय नसून एक जबाबदारी आहे. शिक्षणाच्या माध्यमातून विद्यार्थ्यांचे भविष्य घडविणे हे माझे ध्येय होते, आणि ते पूर्ण करण्याचा मी सदैव प्रयत्न केला” असे सांगितले.
यावेळी शाळेतील सर्व शिक्षकवृंद, शिक्षकेतर कर्मचारी, विद्यार्थी व पालक मोठ्या संख्येने उपस्थित होते. कार्यक्रमाच्या शेवटी त्यांना पुढील आयुष्यासाठी सुख, समृद्धी व उत्तम आरोग्याच्या शुभेच्छा देण्यात आल्या.
