मीरा-भाईंदरमधील डबल-डेकर उड्डाणपुलाचे उद्घाटन ,
वाहतूक सुरळीत करण्यासाठी मोठे पाऊल
मुंबई, दि. ८ ( प्रतिनिधी )
मीरा-भाईंदरमधील वाहतूक कोंडी सोडवून प्रवास अधिक वेगवान आणि सुरक्षित करण्याच्या दृष्टीने महत्त्वाचा टप्पा गाठण्यात आला आहे. मुंबई महानगर प्रदेश विकास प्राधिकरणाने (MMRDA) विकसित केलेल्या अत्याधुनिक डबल-डेकर उड्डाणपुलाचे आज मुख्यमंत्री देवेंद्र फडणवीस यांच्या नेतृत्वाअंतर्गत आणि उपमुख्यमंत्री एकनाथ शिंदे यांच्या हस्ते उद्घाटन करण्यात आले.
वाहतुकीत मोठा बदल घडवणारा प्रकल्प….
मेट्रो मार्गिका ९ चा भाग असलेला हा उड्डाणपूल एस. के. स्टोन जंक्शन ते शिवार गार्डन दरम्यान उभारण्यात आला आहे. यामध्ये मेट्रो आणि रस्ते वाहतुकीसाठी सामायिक खांबांचा (Shared Pier) उपयोग करण्यात आला आहे, त्यामुळे जागेचा प्रभावी वापर आणि वाहतूक सुरळीत होण्यास मदत होणार आहे.
प्रमुख वैशिष्ट्ये :
लांबी : ८५० मीटर
सामायिक खांब : २१
रस्ता रुंदी : १७ मीटर, २+२ मार्गिका
सुरक्षा उपाय : अँटी-क्रॅश बॅरिअर्स, रिफ्लेक्टिव्ह साइन बोर्ड, वेगमर्यादा निदर्शक, पावसाच्या पाण्याचा निचरा करणारी व्यवस्था.
वाहतूक सुधारणा आणि भविष्यातील योजना
या उड्डाणपुलामुळे एस. के. स्टोन जंक्शन, कनाकिया जंक्शन आणि शिवार गार्डन जंक्शनवरील वाहतूक कोंडी कमी होणार आहे. यामुळे प्रवासाचा वेळ लक्षणीयरीत्या कमी होईल आणि इंधन बचतीमुळे पर्यावरणपूरक वाहतूक व्यवस्थेला चालना मिळेल.
मेट्रो लाईन-९ प्रकल्पांतर्गत तीन उड्डाणपुलांचा समावेश असून:
उड्डाणपूल १ (प्लेझंट पार्क – सिल्व्हर पार्क) : ऑगस्ट २०२४ मध्ये सुरू
उड्डाणपूल २ (आज उद्घाटन झाले)
उड्डाणपूल ३ (ऑगस्ट २०२५ पर्यंत पूर्ण होणार)
मुख्यमंत्र्यांची प्रतिक्रिया…
मुख्यमंत्री देवेंद्र फडणवीस म्हणाले, “हा डबल-डेकर उड्डाणपूल जागतिक दर्जाच्या पायाभूत सुविधांची जाणीव करून देतो. यामुळे वाहतूक कोंडी कमी होईल आणि प्रवास अधिक सोयीस्कर बनेल.”
उपमुख्यमंत्री एकनाथ शिंदे यांनीही “हा केवळ उड्डाणपूल नसून, मीरा-भाईंदरच्या विकासासाठी आम्ही दिलेले वचन पूर्ण करण्याचे प्रतीक आहे.” असे मत व्यक्त केले.
नव्या युगातील वाहतूक सुविधा
हा डबल-डेकर उड्डाणपूल केवळ आजच्या वाहतूक गरजा नाही तर भविष्यातील वाढत्या लोकसंख्येच्या प्रवासाच्या गरजा पूर्ण करण्यासाठी तयार करण्यात आला आहे. मेट्रोच्या दुसऱ्या स्तरावरील वाहतूक सेवा सुरू होताच मीरा-भाईंदरमधील प्रवाशांना गतिशील आणि अखंड वाहतूक अनुभवता येणार आहे.
