“बेकायदेशीर रस्ता बंद, हॉस्पिटलजवळ ध्वनीप्रदूषणाचा धोका”
मुंबई, दि. ३० : अजय मगरे
मुंबई विद्यापीठ कलिना कॅम्पस शेजारील एमएमआरडीए मैदानावर होणाऱ्या “ENRIQUE IGLESIAS LIVE IN CONCERT” या आंतरराष्ट्रीय संगीत कार्यक्रमावर राष्ट्रवादी पक्षाने तीव्र आक्षेप घेतला आहे. कार्यक्रमाच्या तयारीदरम्यान आयोजकांनी सार्वजनिक रस्ते बंद करून बेकायदेशीर तंबू आणि गेट उभारल्याचा आरोप करत मुख्यमंत्री देवेंद्र फडणवीस आणि बीकेसी पोलिस ठाण्याचे वरिष्ठ निरीक्षक यांना लेखी तक्रार देण्यात आली आहे.
राष्ट्रवादी पार्टीचे मुंबई प्रदेश सरचिटणीस राजेश सातपुते यांनी दिलेल्या तक्रारीत म्हटले आहे की, “कार्यक्रमाच्या निमित्ताने बीकेसी परिसरातील दोन्ही बाजूंचे सार्वजनिक रस्ते नागरिकांसाठी बंद करण्यात आले आहेत. आयोजकांकडून नागरिकांना ‘पर्यायी रस्त्याने जा’ असे सांगण्यात येत असून, हे वर्तन पूर्णपणे बेकायदेशीर आहे. रस्त्यावर तंबू, तपासणी गेट आणि भव्य स्वागत कमान बांधण्यात आल्या आहेत.”
सातपुते यांनी पुढे म्हटले की, “जेव्हा शेतकरी, विद्यार्थी किंवा कामगार आपले प्रश्न मांडण्यासाठी रस्त्यावर उतरतात, तेव्हा सरकार त्यांच्यावर तातडीने कारवाई करते. मग अशा कॉन्सर्ट आयोजकांवर कारवाई का होत नाही? जर तात्काळ पावले उचलली नाहीत, तर राष्ट्रवादी पक्ष जनआंदोलनाचा मार्ग अवलंबेल.”
तक्रारीत दुसरा गंभीर मुद्दा मांडण्यात आला आहे, ध्वनीप्रदूषणाचा धोका. सातपुते म्हणाले, “या कॉन्सर्टमध्ये अत्यंत मोठ्या स्पीकर्सचा वापर होणार आहे, जे निर्धारित आवाजमर्यादेपेक्षा (डेसिबल) जास्त आहेत. यामुळे जवळच असलेल्या ‘एशियन हार्ट हॉस्पिटल’मधील रुग्णांवर प्रतिकूल परिणाम होऊ शकतो. केवळ १० मीटर अंतरावर असलेल्या हॉस्पिटलमध्ये हृदयशस्त्रक्रिया सुरू असताना अशा तीव्र ध्वनीलहरींमुळे गंभीर परिणाम होऊ शकतात.”
राष्ट्रवादी पक्षाने या पार्श्वभूमीवर कार्यक्रम तात्काळ रद्द करण्याची मागणी केली असून, भविष्यात अशा प्रकारच्या कार्यक्रमांना या परिसरात परवानगी देऊ नये, अशी ठाम भूमिका व्यक्त केली आहे.स्थानिक नागरिकांनीही या तक्रारीला पाठिंबा देत, प्रशासनाने त्वरित चौकशी करून रस्त्यांची मुक्तता करावी, अशी मागणी केली आहे.
