२८८ स्थानिक स्वराज्य संस्थांच्या सार्वत्रिक निवडणुकांचा कार्यक्रम जाहीर; राज्यभर आचारसंहिता लागू
मुंबई, दि. ४ : प्रतिनिधी
राज्यातील २४६ नगरपरिषदा आणि ४२ नगरपंचायती — अशा एकूण २८८ स्थानिक स्वराज्य संस्थांच्या सार्वत्रिक निवडणुकांसाठी २ डिसेंबर २०२५ रोजी मतदान होणार असून, ३ डिसेंबर २०२५ रोजी मतमोजणी पार पडेल, अशी घोषणा राज्य निवडणूक आयुक्त दिनेश वाघमारे यांनी आज पत्रकार परिषदेत केली. या निवडणुकांच्या अनुषंगाने राज्यात आचारसंहिता तात्काळ लागू झाली आहे.
सचिवालय जिमखान्यात झालेल्या पत्रकार परिषदेत राज्य निवडणूक आयोगाचे सचिव सुरेश काकाणी उपस्थित होते. वाघमारे यांनी सांगितले की, नामनिर्देशनपत्र दाखल करण्यास १० नोव्हेंबरपासून सुरुवात होईल, तर अंतिम मुदत १७ नोव्हेंबर असेल. नामनिर्देशनपत्रांची छाननी १८ नोव्हेंबरला होईल. अपील नसलेल्या ठिकाणी माघारीची अंतिम तारीख २१ नोव्हेंबर, तर अपील असलेल्या ठिकाणी २५ नोव्हेंबर असेल.
मतदान सकाळी ७.३० ते सायंकाळी ५.३० दरम्यान घेण्यात येईल. मतमोजणी ३ डिसेंबरला सकाळी १० वाजता सुरू होईल. निकाल जाहीर झाल्यानंतर संबंधित संस्थांपुरती आचारसंहिता संपुष्टात येईल.
राज्यातील २४७ पैकी २४६ नगरपरिषदा या निवडणुकीत सामील होत असून, यापैकी १० नगरपरिषदा नव्याने स्थापन झालेल्या आहेत. पातूर (जि. अकोला) नगरपरिषदेची निवडणूक न्यायालयीन प्रक्रियेमुळे प्रलंबित आहे. त्याचबरोबर, १४७ पैकी ४२ नगरपंचायतींसाठी मतदान होणार आहे. यापैकी १५ नवनिर्मित नगरपंचायती आहेत, तर उर्वरित २७ ची मुदत संपली आहे.
वाघमारे यांनी सांगितले की, निवडणुकीच्या तयारीदरम्यान राजकीय पक्षांच्या प्रतिनिधींशीही चर्चा करण्यात आली आहे. निवडणूक कार्यक्रम जाहीर झाल्यापासून कोणत्याही नगरपरिषदेच्या किंवा नगरपंचायतीच्या कार्यक्षेत्रात धोरणात्मक निर्णय घेण्यास शासनास मज्जाव असेल. मात्र नैसर्गिक आपत्ती किंवा मदतकार्यांबाबतच्या उपाययोजनांवर आचारसंहितेची अडचण येणार नाही, असेही त्यांनी स्पष्ट केले.
राज्य निवडणूक आयोगाने आचारसंहिता अंमलबजावणी आणि कायदा-सुव्यवस्था राखण्यासाठी आज दोन स्वतंत्र आदेश जारी केले आहेत.
महत्त्वाच्या तारखा :
नामनिर्देशनपत्र दाखल : १० नोव्हेंबर २०२५ पासून
अंतिम मुदत : १७ नोव्हेंबर २०२५
छाननी : १८ नोव्हेंबर २०२५
माघारी (अपील नसलेल्यांसाठी) : २१ नोव्हेंबर २०२५
माघारी (अपील असलेल्यांसाठी) : २५ नोव्हेंबर २०२५
मतदान : २ डिसेंबर २०२५
मतमोजणी : ३ डिसेंबर २०२५.
जिल्हानिहाय नगरपरिषदा व नगरपंचाती (न.पं.)
पालघर- डहाणू, जव्हार, पालघर आणि वाडा (न.पं). रायगड- अलिबाग, कर्जत, खोपोली, महाड, माथेरान, मुरुड- जंजिरा, पेण, रोहा, श्रीवर्धन आणि उरण (न.प.). रत्नागिरी- चिपळूण, देवरुख (न.पं.), गुहागर, खेड, लांजा (न.पं.), राजापूर आणि रत्नागिरी. सिंधुदूर्ग- कणकवली (न.पं.), मालवण, सावंतवाडी आणि वेंगुर्ला. ठाणे- अंबरनाथ आणि कुळगाव- बदलापूर. अहिल्यानगर- देवळाली- प्रवरा, जामखेड, कोपरगाव, नेवासा (न.पं.) (न.पं.), पाथर्डी, राहाता, राहूरी, संगमनेर, शेवगाव, शिर्डी, श्रीगोंदा आणि श्रीरामपूर. धुळे- दोंडाईचा-वरवाडे, पिंपळनेर, सिंदखेडा (न.पं.) आणि शिरपूर- वरवाडे. जळगाव- जामनेर, अमळनेर, भडगाव, भुसावळ, चाळीसगाव, चोपडा, धरणगांव, एरंडोल, फैजपूर, मुक्ताईनगर (न.पं.), नशिराबाद, पाचोरा, पारोळा, रावेर, सावदा, शेंदूणी (न.पं.), वरणगाव आणि यावल. नंदूरबार- शहादा, नंदुरबार, नवापूर आणि तळोदा. नाशिक- भगुर, मनमाड, नांदगाव, सटाणा, सिन्नर, येवला, चांदवाड, इगतपूरी, ओझर, पिंपळगांव- बसवंत आणि त्र्यंबक. कोल्हापूर- आजरा (न.पं.), चंदगड (न.पं.), गडहिंग्लज, हातकणंगले, हुपरी, जयसिंगपूर, कागल, कुरुंदवाड, मलकापूर, मुरगूड, पन्हाळा, शिरोळ आणि वडगाव. पुणे- आळंदी, बारामती, भोर, चाकण, दौंड, फुरसुंगी- उरळी देवाची, इंदापूर, जेजूरी, जुन्नर, लोणावळा, मालेगाव बु. (न.पं.), मंचर (न.पं.), राजगुरुनगर, सासवड, शिरुर, तळेगाव- दाभाडे आणि वडगाव (न.पं.). सांगली- आष्टा, आटपाडी (न.पं.), इस्लामपूर, जत, पळूस, शिराळा (न.पं.), तासगाव आणि विटा. सातारा- कराड, महाबळेश्वर, मलकापूर, मेढा (न.पं.), म्हसवड, पाचगणी, फलटण, रहिमतपूर, सातारा आणि वाई. सोलापूर- अक्कलकोट, अकलूज, अनागर (न.पं.), बार्शी, दुधनी, करमाळा, कुर्डूवाडी, मैदर्गी, मंगळवेढा, मोहोळ, पंढरपूर आणि सांगोला. बीड- अंबेजोगाई, बीड, धारुर, गेवराई, माजलगाव आणि परळी- वैजनाथ. छत्रपती संभाजीनगर- फुलब्री (न.पं.), गंगापूर, कन्नड, खुलताबाद, पैठण, सिल्लोड आणि वैजापूर. धाराशिव- भूम, कळंब, मुरुम, नळदुर्ग, धाराशिव, परंडा, तुळजापूर आणि उमरगा. हिंगोली- बसमतनगर, हिंगोली आणि कळमनुरी. जालना- अंबड, भोकरदन आणि परतूर. लातूर- अहमदपूर, औसा, निलंगा, रेनापूर (न.पं.) आणि उदगीर. नांदेड- बिलोली, देगलूर, धर्माबाद, हदगाव, हिमायतनगर (न.पं.), कंधार, कुंडलवाडी, मुदखेड, मुखेड, उमरी, भोकर, किनवट आणि लोहा. परभणी- गंगाखेड, जिंतूर, मानवत, पाथरी, पूर्णा, सेलू आणि सोनपेठ. अकोला- अकोट, बाळापूर, बार्शी- टाकळी, हिवरखेडा, मूर्तिजापूर आणि तेल्हारा. अमरावती- अचलपूर, अंजनगाव सूर्जी, चांदूरबाजार, चांदूर रेल्वे, चिखलदरा, दर्यापूर, धामणगाव रेल्वे, धारणी (न.पं.), मोर्शी, नांदगाव खंडेश्वर (न.पं.), शेंदूरजनाघाट आणि वरुड. बुलढाणा- बुलढाणा, चिखली, देऊळगाव राजा, जळगाव जामोद, खामगाव, लोणार, मलकापूर, मेहकर, नांदूरा, शेंगाव आणि सिंदखेडराजा. वाशीम- कारंजा, मालेगाव (न.पं.), मंगरुळपीर, रिसोड आणि वशीम. यवतमाळ- आर्णी, दारव्हा, दिग्रस, घाटंजी, पुसद, उमरखेड, वणी, यवतमाळ, ढाणकी (न.पं.), नेर- नबाबपूर आणि पांढरकवडा. भंडारा- पवनी, साकोली शेंदूरवाफा, तुमसर आणि भंडारा. चंद्रपूर- बल्लारपूर, भद्रावती, भिसी (न.पं.), ब्रह्मपूरी, चिमूर, गडचांदूर, घुग्घुस, मूल, नागभीड, राजूरा आणि वरोरा. गडचिरोली- आरमोरी, देसाईगंज आणि गडचिरोली. गोंदिया- गोंदिया, गोरेगाव (न.पं.), सालेकसा (न.पं.) आणि तिरोडा. नागपूर- बहादुरा (न.पं.), बेसा पिपळा (न.पं.), भिवापूर (न.पं.), बुटिबोरी, डिगडोह, कळमेश्वर- ब्रह्मणी, कामठी, कांद्री- कन्हान (न.पं.), काटोल, खापा, कोंढाळी (न.पं.), महादुला (न.पं.), मोहपा, मौदा (न.पं.), नरखेड, निलडोह (न.पं.), पारशिवणी (न.पं.), रामटेक, सावनेर, उमरेड, वानाडोंगरी, बिडगाव- तरोडी (खू) पांढुर्णा (न.पं.), गोधणी रेल्वे (न.पं.), कन्हान- पिपरी, मोवाड, वाडी आणि येरखेडा (न.पं.). वर्धा- आर्वी, देवळी, हिंगणघाट, पुलगाव, सिंदी रेल्वे आणि वर्धा.
