कोपरगाव, दि.२१ ( दिलीप गायकवाड )
कोपरगाव नगर परिषद संचलित भारतरत्न डॉ. बाबासाहेब आंबेडकर सार्वजनिक वाचनालय आणि समता अभ्यासीका यांच्या वतीने जागतिक योग दिन मोठ्या उत्साहात साजरा करण्यात आला. या विशेष कार्यक्रमात योगाभ्यासाचे प्रात्यक्षिक व प्राणायामाचे महत्त्व सांगण्यात आले.हा कार्यक्रम समता अभ्यासीका या ठिकाणी पार पडला.
कार्यक्रमाचे मुख्य आकर्षण ठरले ग्रंथालयाचे ग्रंथपाल व योगशिक्षक महेश थोरात सर यांचे योग प्रात्यक्षिक. त्यांनी उपस्थित विद्यार्थ्यांना विविध योगासने शिकवली आणि त्यांच्या शारीरिक-मानसिक फायद्यांविषयी माहिती दिली. यानंतर संजीवनी सैनिकी स्कूलचे माजी प्राचार्य डॉ. जी. बी. गायकवाड सर यांनी प्राणायाम व मेडिटेशन यावर शास्त्रोक्त माहिती दिली आणि प्रत्यक्ष सरावही करवून घेतला.
या उपक्रमामुळे विद्यार्थ्यांमध्ये योगाबाबत जागरूकता निर्माण झाली. सर्व उपस्थित विद्यार्थ्यांच्या वतीने या उपक्रमाबद्दल मनःपूर्वक आभार व्यक्त करण्यात आले.
कार्यक्रमाचे सूत्रसंचालन गणेश वैद्य व अतुल शिंदे यांनी उत्कृष्टरीत्या पार पाडले.
