पुण्यातील बालाजीनगरमध्ये भरदिवसा गोळीबार
पुणे पुन्हा रक्तरंजित गँगवॉरने हादरलं! आंदेकर खून प्रकरणाच्या बदल्यात भरदिवसा तरुणावर गोळीबार करत कोयत्याने सपासप वार करण्यात आल्याची थरारक घटना बालाजीनगर परिसरात घडली. पुणे-सातारा रस्त्यावरील राजर्षी शाहू बँकेसमोरील हॉटेलबाहेर झालेल्या या हल्ल्यामुळे परिसरात एकच खळबळ उडाली असून, शहरातील टोळीयुद्ध पुन्हा पेटल्याची चर्चा सुरू झाली आहे. या जीवघेण्या हल्ल्यात अक्षय उर्फ बाळा बापू म्हस्के (वय २६) गंभीर जखमी झाला असून, त्याच्यावर खासगी रुग्णालयात उपचार सुरू आहेत.
पोलिसांनी दिलेल्या माहितीनुसार, आंदेकर खून प्रकरणात अक्षयचा भाऊ आकाश म्हस्के याला यापूर्वी अटक करण्यात आली होती. या प्रकरणातील आरोपींना मध्य प्रदेशातून पिस्तुले पुरवल्याचा आरोप त्याच्यावर आहे. त्यामुळे या जुन्या वैमनस्यातूनच अक्षयवर हल्ला करण्यात आल्याचा संशय व्यक्त केला जात आहे.
बुधवारी सकाळी अक्षय म्हस्के हा नाश्त्यासाठी बालाजीनगर परिसरात आला होता. राजर्षी शाहू बँक चौकात तो थांबलेला असताना दुचाकीवरून आलेल्या हल्लेखोरांनी त्याच्यावर अचानक पिस्तुलातून गोळीबार केला. यातील एक गोळी त्याच्या पायात घुसली. त्यानंतरही हल्लेखोरांचा संताप शांत झाला नाही. त्यांनी अक्षयवर कोयत्याने वार करत परिसरात दहशत निर्माण केली. भररस्त्यात घडलेल्या या प्रकारामुळे नागरिकांमध्ये भीतीचे वातावरण पसरले.
रक्ताच्या थारोळ्यात पडलेल्या अक्षयला तातडीने खासगी रुग्णालयात दाखल करण्यात आले. त्याची प्रकृती गंभीर असल्याची माहिती सूत्रांनी दिली. घटनेची माहिती मिळताच परिमंडळ दोनचे पोलिस उपायुक्त मिलिंद मोहिते यांनी घटनास्थळी धाव घेत पाहणी केली.
“प्राथमिक चौकशीत वैमनस्यातून हा गोळीबार झाल्याचे समोर आले आहे. पसार झालेल्या हल्लेखोरांचा शोध घेण्यासाठी पोलिसांची विशेष पथके रवाना करण्यात आली आहेत,” अशी माहिती पोलिसांकडून देण्यात आली.
पुण्यात काही महिन्यांपासून गँगवॉरच्या घटना पुन्हा डोके वर काढत असून, भरदिवसा होणाऱ्या हल्ल्यांमुळे कायदा-सुव्यवस्थेचा प्रश्न ऐरणीवर आला आहे.
