सहा सनदी अधिकाऱ्यांच्या बदल्या
मुंबई : मंगेश म्हात्रे
आपल्या कडक प्रशासन शैलीसाठी ओळखले जाणारे ज्येष्ठ सनदी अधिकारी तुकाराम मुंढे यांची पुन्हा एकदा बदली करण्यात आली असून, त्यांच्याकडे आता अन्न आणि औषध प्रशासन (FDA) आयुक्तपदाची जबाबदारी सोपवण्यात आली आहे. विशेष म्हणजे, त्यांच्या 21 वर्षांच्या प्रशासकीय कारकिर्दीतील ही तब्बल 25 वी बदली ठरली आहे. त्यामुळे राज्याच्या प्रशासकीय वर्तुळात या निर्णयाची जोरदार चर्चा सुरू झाली आहे.
सामान्य प्रशासन विभागाने मंगळवारी सहा वरिष्ठ सनदी अधिकाऱ्यांच्या बदल्यांचे आदेश जारी केले. काही आठवड्यांपूर्वी आपत्ती व्यवस्थापन विभागात बदली होऊनही प्रत्यक्ष रुजू होण्याची संधी न मिळालेल्या मुंढे यांना अखेर महत्वाच्या मानल्या जाणाऱ्या FDA विभागाची जबाबदारी देण्यात आली.
याआधी दिव्यांग कल्याण विभागात कार्यरत असताना मुंढे यांनी बोगस दिव्यांग प्रमाणपत्रांच्या आधारे सरकारी लाभ घेणाऱ्यांविरोधात कठोर मोहीम उघडली होती. आता लाचखोरीच्या आरोपांमुळे चर्चेत आलेल्या FDA विभागात त्यांची एन्ट्री झाल्याने प्रशासनात मोठे बदल होण्याची शक्यता व्यक्त केली जात आहे.
दरम्यान, औषध विक्रेत्यांनी बुधवारी आंदोलनाची हाक दिलेली असतानाच नियमांवर बोट ठेवून काम करणाऱ्या मुंढे यांची नियुक्ती अधिकच महत्वाची मानली जात आहे.
सहा सनदी अधिकाऱ्यांच्या बदल्या
- संजय खंदारे यांच्याकडे FDA विभागाच्या सचिवपदाचा अतिरिक्त कार्यभार
- श्रीधर डुबे यांची SRA, ठाणे येथे बदली
- बाबासाहेब बेलदार यांची धुळे जिल्हा परिषद CEO पदी नियुक्ती
- कान्हूराज बगाटे यांची महामुंबई मेट्रो संचलन महामंडळाच्या MD पदी बदली
- आर. एस. चव्हाण यांची हाफकीन जीव औषध निर्माण महामंडळाच्या MD पदी नियुक्ती
“कडक शिस्त, धडाकेबाज निर्णय आणि सततच्या बदल्या” यामुळे ओळखले जाणारे तुकाराम मुंढे आता FDA मध्ये काय मोठे निर्णय घेतात, याकडे संपूर्ण राज्याचे लक्ष लागले आहे.
