मुंबई, दि. १७ ( मंगेश म्हात्रे )
म्हाडाच्या मुंबई मंडळात पुन्हा एकदा मोठा आर्थिक घोटाळा उघडकीस आला आहे. यापूर्वीच बनावट भू-भाडे पावत्यांच्या प्रकरणाची पोलिसांकडून चौकशी सुरू असताना, आता गृहनिर्माण संस्थांच्या भाडेपट्टा व अभिहस्तांतरण करारात बनावट पावत्यांच्या माध्यमातून लाखो रुपयांचा महसुली गैरव्यवहार झाल्याचे निष्पन्न झाले आहे.
म्हाडामध्ये दररोज विविध अर्जदारांकडून शुल्काच्या रकमा जमा होतात. या रकमा भरल्यानंतर अधिकृत पावती दिली जाते, जी पुढील प्रशासकीय प्रक्रियेसाठी सादर केली जाते. मात्र अलीकडे लेखा विभागाने केलेल्या अंतर्गत पडताळणीत धक्कादायक बाब समोर आली आहे – काही प्रकरणांमध्ये पावती असूनही संबंधित रक्कम म्हाडाच्या खात्यात जमा झालेली नाही.
बोरीवली विभागातील एका गृहनिर्माण संस्थेच्या प्रकरणात तब्बल ₹५७ लाखांची बनावट पावती आढळून आली आहे. पावतीवर नमूद असलेल्या दिवशी म्हाडाच्या बँक खात्यात अशी कोणतीही रक्कम जमा झालेली नव्हती, अशी अधिकृत तपासणीत स्पष्ट झालं आहे.
या घोटाळ्यामुळे म्हाडाच्या आर्थिक प्रक्रियेवर, पारदर्शक कार्यपद्धतीवर गंभीर प्रश्न उपस्थित झाले आहेत. विशेष म्हणजे, लेखा विभागाची खातरजमा होण्याआधीच काही फायली मंजूर झाल्याचेही निष्पन्न झाले आहे. विश्वसनीय सूत्रांच्या माहितीनुसार, काही वरिष्ठ अधिकारी हे प्रकरण गुप्त ठेवण्याचा आणि दडपण्याचा प्रयत्न करत असल्याची शंका व्यक्त केली जात आहे.
याविषयी मुंबई मंडळाचे मुख्य अधिकारी मिलिंद बोरीकर यांनी प्रतिक्रिया देताना सांगितले की, “बोगस पावतीच्या प्रकरणाची मला अद्याप माहिती नाही. तपशील घेतल्यानंतरच सांगता येईल.”
