मुंबई, दि.१४ : अजय मगरे
महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने फेब्रुवारी-मार्च २०२६ मध्ये होणाऱ्या दहावी (एस.एस.सी.) व बारावी (एच.एस.सी.) परीक्षांच्या प्राथमिक तारखा जाहीर करण्यात आल्या आहेत. राज्यातील सर्व नऊ विभागीय मंडळांमार्फत (पुणे, नागपूर, छ. संभाजीनगर, मुंबई, कोल्हापूर, अमरावती, नाशिक, लातूर व कोकण) या परीक्षा एकाच वेळापत्रकानुसार पार पडतील.
बारावीची परीक्षा १० फेब्रुवारीपासून
उच्च माध्यमिक प्रमाणपत्र (बारावी) परीक्षेच्या लेखी परीक्षा मंगळवार, दि. १० फेब्रुवारी २०२६ पासून सुरू होऊन बुधवार, दि. १८ मार्च २०२६ पर्यंत चालणार आहेत. तसेच माहिती तंत्रज्ञान व सामान्यज्ञान विषयांच्या ऑनलाईन परीक्षा देखील याच कालावधीत घेतल्या जाणार आहेत.
दहावीची परीक्षा २० फेब्रुवारीपासून
माध्यमिक शालान्त प्रमाणपत्र (दहावी) परीक्षेच्या लेखी परीक्षा शुक्रवार, दि. २० फेब्रुवारी २०२६ पासून सुरू होऊन बुधवार, दि. १८ मार्च २०२६ रोजी संपणार आहेत.
प्रात्यक्षिक परीक्षा जानेवारीतच
बारावीच्या प्रात्यक्षिक, श्रेणी, तोंडी व अंतर्गत मूल्यमापन परीक्षा शुक्रवार, दि. २३ जानेवारी ते सोमवार, दि. ९ फेब्रुवारी २०२६ दरम्यान घेण्यात येतील. तर दहावीच्या प्रात्यक्षिक परीक्षा सोमवार, दि. २ फेब्रुवारी ते बुधवार, दि. १८ फेब्रुवारी २०२६ या कालावधीत पार पडतील. या कालावधीत शरीरशास्त्र, आरोग्यशास्त्र, गृहशास्त्र तसेच माहिती तंत्रज्ञान विषयांच्या प्रात्यक्षिक परीक्षाही होणार आहेत.
विद्यार्थ्यांच्या सोयीसाठी आगाऊ जाहीर
राज्य मंडळाने शाळा व कनिष्ठ महाविद्यालयांना अभ्यासक्रम नियोजन सुलभ व्हावे आणि विद्यार्थ्यांवरील परीक्षा ताण कमी व्हावा या उद्देशाने हे वेळापत्रक आगाऊ जाहीर केले आहे.
अंतिम विषयवार वेळापत्रक मंडळाच्या संकेतस्थळावर यथावकाश प्रसिद्ध केले जाणार असल्याची माहिती राज्य मंडळाचे सहसचिव प्रमोद गोफणे यांनी दिली.
