शिवसेनेचे युवा नेतृत्व ठरणार, पंचायत समितीचे उमेदवार?
पैठण, दि.१९ 🙁 प्रतिनिधी)
स्थानिक स्वराज्य संस्थांच्या निवडणुकीची रणधुमाळी सुरू झाली असून, पैठण तालुक्यात भावी उमेदवारांच्या भेटीगाठींना वेग आला आहे. यामध्ये पंचायत समितीच्या नांदर गणात (सर्वसाधारण – पुरुष) या जागेवरून शिवसेनेचे युवा तडफदार नेते आणि नानेगाव ग्रामपंचायतीचे विद्यमान सरपंच अनिल बोधने यांच्या नावाची सध्या जोरदार चर्चा सुरू आहे.
खासदार संदीपान भुमरे व आमदार विलास भुमरे यांचे विश्वासू कार्यकर्ते म्हणून ओळखले जाणारे अनिल बोधने हे कार्यकर्त्यांमध्ये लोकप्रिय आहेत. त्यांच्या नावावर सध्या सोशल मीडियावर शुभेच्छांचा वर्षाव होत असून, “भावी पं.स. सदस्य म्हणून अनिल बोधने” असा उल्लेख मोठ्या प्रमाणावर होत आहे.
सरपंच कार्यकाळात अनिल बोधने यांनी नानेगाव ग्रामपंचायतीत विकासकामांचा धडाका लावला. सिमेंट रस्ते, पिण्याच्या पाण्याची व्यवस्था, सार्वजनिक व शेतातील वीजपुरवठा, पानंद रस्ते, विहिरी, गायगोठे व शेतीसाठी अनुदान अशा अनेक सुविधा ग्रामस्थांना मिळवून दिल्या. त्यांच्या कामगिरीमुळे त्यांचा प्रभाव केवळ नानेगावपुरता मर्यादित न राहता नांदर गण आणि दावरवाडी गटातही पोहोचला आहे.
शिवसेनेचे कट्टर कार्यकर्ते म्हणून ओळख असलेले बोधने सामाजिक, शैक्षणिक आणि राजकीय कार्यात सतत पुढाकार घेतात. कुठलेही सामाजिक कार्य असो — कार्यक्रम असो किंवा मदत मोहिम — त्यात त्यांचा सक्रिय सहभाग असतो.
पक्षाने संधी दिल्यास नांदर गणातून अनिल बोधने यांना पं.स. उमेदवारी द्यावी, अशी मागणी स्थानिक कार्यकर्त्यांकडून मोठ्या प्रमाणावर होत आहे.
खा. संदीपान भुमरे व आ. विलास भुमरे यांच्या नेतृत्वाखाली पहिल्यांदाच नव्याने झालेल्या नानेगाव ग्रामपंचायत निवडणुकीत अनिल बोधने यांनी भगवा झेंडा फडकावत प्रचंड मताधिक्याने विजय मिळवला होता. त्यामुळेच आता नांदर गणातील पं.स. निवडणुकीत त्यांच्याकडे शिवसेनेचा तगडा पर्याय म्हणून पाहिले जात आहे.
