मुंबई, दि.१९ : मंगेश म्हात्रे
प्रभाग रचना जाहीर होताच मुंबई महापालिका निवडणुकीचा माहोल तापू लागला आहे. सायन–कोळीवाडा मतदारसंघातील सर्व प्रभाग महिलांसाठी राखीव झाल्यानंतर भाजपने आपल्या संघटनात्मक हालचालींना वेग देत महिला मोर्च्यात मोठे बदल केले आहेत. या पार्श्वभूमीवर भाजपकडून वैशाली पगारे यांची सायन कोळीवाडा महिला मोर्चाच्या सचिवपदी नियुक्ती करण्यात आली आहे.
वैशाली पगारे या भाजप मुंबईचे सचिव विजय पगारे यांच्या पत्नी असून विजय पगारे हे आमदार प्रसाद लाड यांचे खंदे समर्थक मानले जातात. २०१७ मध्ये सायन प्रतीक्षा नगर वॉर्ड क्र. १७३ भाजप तिकीटावर विजय पगारे यांनी निवडणूक लढवली होती. यंदाच्या प्रभाग आरक्षणात वॉर्ड क्र. १७३ सर्वसाधारण महिलांसाठी राखीव आल्याने वैशाली पगारे यांच्या संभाव्य उमेदवारीला अधिक बळ मिळाल्याचे मानले जाते.
वैशाली पगारे यांची नियुक्ती वॉर्ड १७३ मधील उमेदवारीसाठीचा ‘पहिला महत्त्वाचा टप्पा’ म्हणून राजकीय वर्तुळात चर्चा सुरू झाली आहे. प्रसाद लाड गटाकडून निवडणुकीआधी आखलेली ही रणनीतीपूर्वक चाल असल्याचे जाणकारांचे मत आहे.
