महिला डॉक्टरच्या तक्रारीकडे दुर्लक्ष;
सात दिवसांत सविस्तर अहवाल सादर करण्याचे निर्देश…
मुंबई, दि. ५ : अजय मगरे
राज्य महिला आयोगाकडे दाखल तक्रारीवर विहित मुदतीत अहवाल सादर न केल्याने आणि सुनावणीदरम्यान आपली भूमिका स्पष्ट न केल्याने सर जे. जे. समूह रुग्णालयाच्या अधिष्ठात्यांना महाराष्ट्र राज्य महिला आयोगाने नोटीस बजावली आहे.
रुग्णालयातील स्त्रीरोग व प्रसूतिशास्त्र विभागातील एका महिला प्राध्यापक-डॉक्टरांनी त्यांच्या विभागप्रमुखाकडून होत असलेल्या सततच्या मानसिक त्रास आणि अपमानास्पद वागणुकीबाबत १० जुलै २०२५ रोजी आयोगाकडे तक्रार दाखल केली होती. या तक्रारीवर आयोगाने रुग्णालय प्रशासनाकडून १८ जुलै व २४ ऑक्टोबर २०२५ रोजी दोन वेळा सविस्तर अहवाल मागविला होता. मात्र, रुग्णालय प्रशासनाकडून प्रतिसाद न मिळाल्याने आयोगाने याची गंभीर नोंद घेत २९ ऑक्टोबर रोजी सुनावणी आयोजित केली.
सुनावणीस उपस्थित रुग्णालय प्रतिनिधीकडे तक्रार व त्यावर झालेल्या कार्यवाहीबाबत कोणतीही ठोस माहिती नव्हती. त्यामुळे महिला कर्मचाऱ्यांच्या तक्रारींकडे दुर्लक्ष केल्याचा व आयोगाच्या सूचनांकडे दुर्लक्ष केल्याचा ठपका ठेवत आयोगाने अधिष्ठात्यांना नोटीस बजावली आहे.
आयोगाने रुग्णालयातील अंतर्गत तक्रार समितीची (आय सी कमिटी) संपूर्ण माहिती, तक्रारदार महिलेच्या प्रकरणातील कार्यवाहीचा सविस्तर अहवाल, तसेच संबंधित अधिकारी सेवानिवृत्तीनंतर पुन्हा महत्त्वाच्या जबाबदाऱ्या सांभाळत असल्याने तक्रारदार महिलेस मानसिक त्रास होत असल्याची बाब शासनाला अवगत केली का, याबाबत खुलासा करण्याचे आदेश दिले आहेत.
हा सविस्तर अहवाल सात दिवसांच्या आत आयोगाकडे सादर करण्याचे निर्देश अधिष्ठाता, सर जे. जे. समूह रुग्णालय यांना देण्यात आले आहेत.
