कोपरगाव, दि.२१ ( दिलीप गायकवाड )
कोपरगाव शहरात हिंदुस्थान पेट्रोलियम गॅस कंपनी (एचपी गॅस) च्या शहर वितरण विभागामार्फत गॅस ग्राहकांना वेळेत आणि दर्जेदार सेवा देण्याचा आमचा नेहमीच प्रयत्न असतो, असे कंपनीचे कार्यालयीन मॅनेजर लक्ष्मण निमसे यांनी सांगितले.
पावसाळ्यातही गॅस वेळेत पोहोचवण्यासाठी आमची टीम सदैव सज्ज असते. ग्राहकांच्या तक्रारी तत्काळ घेतल्या जातात आणि योग्य त्या उपाययोजना केल्या जातात. ग्राहकांना ऑनलाईन आणि ऑफलाईन अशा दोन्ही पद्धतीने पेमेंटची सुविधा उपलब्ध करून देण्यात आली आहे, असेही त्यांनी स्पष्ट केले.
कोपरगाव शहरात एचपी गॅसच्या तीन एजन्सी कार्यरत आहेत. त्यामध्ये गुरुराज एचपी गॅस कंपनी (आद्यौगिक वसाहत), गोपाळ कृष्ण गॅस कंपनी (संसार) आणि मुख्य कोपरगाव गॅस कंपनी यांचा समावेश आहे.
पाच किलोच्या गॅस सिलिंडर संदर्भात बोलताना, निमसे यांनी सांगितले की, “सरकारच्या उज्ज्वला योजनेअंतर्गत या सिलिंडरची किंमत ३१९ रुपये आहे. उर्वरित रक्कम थेट सरकारकडून लाभार्थ्याच्या खात्यावर पाठवण्यात येते. मात्र ग्राहकांकडून रोख किंवा ऑनलाईन स्वरूपात पैसे स्वीकारले जातात.”
ओपन मार्केटमध्ये पाच किलोचा सिलिंडर सुमारे ५३० रुपयांमध्ये उपलब्ध होतो. उज्ज्वला योजनेच्या लाभार्थ्यांची संख्या सुमारे चार हजार आहे. ही योजना फक्त घरगुती वापरासाठी आहे. अन्नपूर्णा योजनेंतर्गत ऑक्टोबर २०२४ मध्ये एक सिलिंडर देण्यात आला होता, मात्र उर्वरित दोन सिलिंडर देण्यात आले नसल्याने यासंबंधीची माहिती उपलब्ध नाही.
भारत गॅसच्या दोन वितरण कंपन्याही कोपरगावात कार्यरत आहेत. पाच किलोच्या सिलिंडरबाबत कोणत्याही प्रकारचा गैरप्रकार होत असल्याचे निदर्शनास आलेले नाही, असेही त्यांनी स्पष्ट केले.
सध्या १४.२ किलो घरगुती गॅस सिलिंडरची किंमत ८५६.५० रुपये आहे, तर व्यावसायिक वापरासाठी १९ किलो गॅस सिलिंडरची किंमत १७५० रुपये इतकी आहे. गॅस वितरणात ब्लॅकमेलिंग अथवा अनधिकृत व्यवहार होत नसल्याचे त्यांनी स्पष्ट केले.
“डिलिव्हरी बॉयकडून कोणत्याही प्रकारचे पैसे स्वीकारले जात नाहीत. जर कोणताही डिलिव्हरी बॉय ग्राहकांकडून पैसे मागत असेल, तर ग्राहकांनी त्वरित तक्रार नोंदवावी. अशा प्रकरणी कंपनी कठोर कारवाई करेल,” असा इशाराही निमसे यांनी दिला.
