मुंबई, दि.३ ( प्रतिनिधी )
)महाराष्ट्र राज्य मार्ग परिवहन महामंडळातील (एसटी) प्रवाशांना येत्या दोन वर्षांत नव्या स्वरूपाचा अनुभव मिळणार आहे. राज्यातील ८४० बसडेपो आधुनिक बसपोर्टमध्ये रुपांतरित केले जाणार असून, महामंडळाचे संपूर्ण आधुनिकीकरण करून ‘एसटी’चा चेहरामोहरा बदलणार असल्याची माहिती परिवहन मंत्री प्रताप सरनाईक यांनी विधानपरिषदेत दिली.
सध्या महामंडळाकडे १४,५०० बसेस कार्यरत असून त्या जुन्या झाल्यामुळे दरवर्षी ५,००० याप्रमाणे पुढील पाच वर्षांत २५,००० नवीन बसेस खरेदी करण्यात येणार आहेत. यामध्ये ५,१५० इलेक्ट्रिक बसेस लवकरच सेवेत दाखल होणार असल्याचेही त्यांनी सांगितले.
विधान परिषदेत ॲड. अनिल परब, शशिकांत शिंदे, सदाभाऊ खोत यांनी ‘एसटी’ संदर्भात उपस्थित केलेल्या चर्चेला उत्तर देताना मंत्री सरनाईक म्हणाले, “बसडेपोची रूपरेषा बदलून त्यांना बसपोर्टमध्ये विकसित केले जाईल. यासाठी निविदा प्रक्रिया सुरू असून ती पारदर्शक आणि स्पर्धात्मक राहील.”
महामंडळाच्या आधुनिकीकरणात प्रवाशांसाठी स्वच्छ व अधिक चांगल्या सुविधा उपलब्ध करून देण्यात येणार आहेत. प्रत्येक बसपोर्टमध्ये ई-टॉयलेट, चालक-वाहकांसाठी युनिफॉर्म धुण्याची सोय, गरम पाणी आदी सुविधा देण्यात येणार आहेत. डेपो आणि बसेस स्वच्छ ठेवण्यावरही भर राहील, असेही सरनाईक यांनी स्पष्ट केले.
