मुंबई, दि १९ : मंगेश म्हात्रे
महापालिका निवडणुकीचे ढोल वाजू लागले असून, इच्छुकांनी जनसंपर्क वाढवण्याचे प्रयत्न जोरात सुरू केले आहेत. सण, उत्सव आणि समाजकारण या तिन्हींचा सुंदर संगम साधत भाजपचे मुंबई सचिव आशिष साळसकर यांनी सायन-सुंदर कमला नगर परिसरात दिवाळीच्या शुभेच्छांद्वारे मतदारांशी संवाद साधला.
दीपावलीच्या निमित्ताने साळसकर यांनी सुंदर कमला नगर येथे भव्य दीपोत्सवाचे आयोजन केले होते. या दीपोत्सवाला आमदार प्रसाद लाड यांनी विशेष उपस्थिती दर्शवली. यावेळी त्यांच्या हस्ते आकर्षक सेल्फी पॉइंटचे अनावरण करण्यात आले.
या कार्यक्रमात परिसरातील नागरिक, महिला व तरुणांचा उत्स्फूर्त सहभाग दिसून आला. दीपोत्सवाच्या निमित्ताने परिसर प्रकाशमय झाला आणि आनंदाचा उत्सव साजरा करण्यात आला. कार्यक्रमाचे उत्कृष्ट आयोजन केल्याबद्दल आमदार प्रसाद लाड यांनी लक्ष्मण बाईत फाउंडेशन आणि आयोजक आशिष साळसकर यांचे कौतुक केले.
दीपोत्सवाच्या माध्यमातून साळसकर यांनी नागरिकांना दिवाळीच्या शुभेच्छा देताना आगामी महापालिका निवडणुकीत विकासाच्या कामांवर लक्ष केंद्रित करण्याचे आश्वासन दिले. “सुंदर कमला नगरचा सर्वांगीण विकास हेच आमचं ध्येय आहे,” असे साळसकर म्हणाले.
कार्यक्रमाच्या शेवटी उपस्थितांनी एकमेकांना शुभेच्छा दिल्या आणि दीपोत्सवाचा आनंद साजरा केला. नागरिकांकडून या उपक्रमाला चांगला प्रतिसाद मिळाला असून, राजकीय वर्तुळात या उपक्रमाची जोरदार चर्चा रंगली आहे.
