मुंबई : म्हाडाच्या मुंबई मंडळाच्या विविध वसाहतींमधील एकूण ११८ सदनिका ‘प्रथम येणाऱ्यास प्रथम प्राधान्य’ या तत्त्वावर विक्रीसाठी उपलब्ध करून देण्यात येणार आहेत. या घरांसाठी ऑनलाइन अर्ज नोंदणीची प्रक्रिया १७ फेब्रुवारी २०२६ रोजी सकाळी ११ वाजेपासून सुरू होणार असून इच्छुक नागरिकांनी म्हाडाच्या अधिकृत संकेतस्थळावर अर्ज करावा, असे आवाहन करण्यात आले आहे.
म्हाडाने यापूर्वी सोडतीद्वारे विक्रीसाठी जाहीर केलेल्या परंतु विविध कारणांमुळे रिक्त राहिलेल्या सदनिकांचा या योजनेत समावेश आहे. सुरुवातीला ही प्रक्रिया फेब्रुवारीच्या सुरुवातीला होणार होती; मात्र तांत्रिक अडचणीमुळे ती पुढे ढकलण्यात आली होती. आता नव्याने वेळापत्रक जाहीर करण्यात आले आहे.
अर्ज प्रक्रिया कधी सुरू होणार?
• नोंदणी सुरू: १७ फेब्रुवारी २०२६, सकाळी ११ वाजता
• अर्ज सादर करणे, अनामत रक्कम व शुल्क भरणा, सदनिका निवड: ४ मार्च २०२६ पासून
अर्जदारांनी प्रथम अधिकृत संकेतस्थळावर नोंदणी करणे आवश्यक असून त्यानंतर अनामत रक्कम भरल्यानंतर उपलब्ध सदनिकांची यादी पाहून पसंतीची सदनिका निश्चित करता येणार आहे.
📍 कुठे उपलब्ध आहेत घरे?
मंडळाने बांधलेल्या आणि विविध नियमांअंतर्गत प्राप्त झालेल्या सदनिकांचा समावेश या विक्रीत आहे.
मंडळाने बांधलेल्या सदनिका (८२):
• शिंपोली, कांदिवली
• चारकोप सेक्टर-८
• अँटॉप हिल, वडाळा
• तुंगा, पवई
• पीएमजीपी, मानखुर्द
• मालवणी, मालाड
• गायकवाड नगर
इतर प्राप्त सदनिका (३६):
• घाटकोपर पूर्व
• कन्नमवार नगर, विक्रोळी
• भायखळा
• ताडदेव
• लोअर परळ
• सायन
• जेव्हीपीडी, अंधेरी पश्चिम
पेमेंटची अट काय?
• सदनिका निश्चित केल्यानंतर ४८ तासांच्या आत विक्री किंमतीच्या १०% रकमेचा भरणा आवश्यक
• त्यानंतर उर्वरित रक्कम ९० दिवसांच्या आत भरावी
• वेळेत भरणा न केल्यास सदनिकेवरील दावा रद्द होईल
पात्रता आणि कागदपत्रे
• अर्जदाराचे वय किमान १८ वर्षे
• भारतीय नागरिक असणे आवश्यक
• महाराष्ट्रात किमान १५ वर्षे वास्तव्य (डोमिसाइल प्रमाणपत्र)
• आधार-पॅन, वैवाहिक स्थितीनुसार आवश्यक कागदपत्रे
• आरक्षणासाठी जात पडताळणी प्रमाणपत्र
मुंबईत घर खरेदीची संधी शोधणाऱ्यांसाठी ‘प्रथम येणाऱ्यास प्रथम प्राधान्य’ पद्धतीने उपलब्ध झालेल्या या ११८ सदनिकांमुळे अनेकांना थेट अर्ज करून घर मिळवण्याची संधी उपलब्ध झाली आहे. इच्छुकांनी वेळेत नोंदणी करून आवश्यक प्रक्रिया पूर्ण करणे महत्त्वाचे ठरणार आहे.
