सात झोपड्या व मंदिर हटवून प्रकल्पाला दिली गती
मुंबई, दि.२५ : अजय मगरे
वरळी-शिवडी उन्नत मार्ग या महत्वाकांक्षी प्रकल्पाला गती देण्यासाठी मार्गिकेमध्ये येणारी बांधकामे हटविण्याची प्रक्रिया सुरू झाली आहे. मुख्यमंत्री सचिवालय,मंत्रालय यांच्या निर्देशानुसार झोपडपट्टी पुनर्वसन प्राधिकरणाच्या वतीने कारवाई करण्यात आली.
झोपडपट्टी पुनर्वसन प्राधिकरणाचे मुख्य कार्यकारी अधिकारी डॉ. महेंद्र कल्याणकर यांच्या सूचनेनुसार उपजिल्हाधिकारी वंदना गेवराईकर यांच्या अधिपत्याखाली पोलिस बंदोबस्तात कार्यवाही पार पडली.
यावेळी रस्त्याच्या मध्यभागी असलेले मंदिर सुरक्षितपणे हलवून रस्त्याच्या कडेला करण्यात आले. त्यानंतर सदर जागा वरळी-शिवडी उन्नत मार्ग प्रकल्पाकरिता एमएमआरडीएच्या ताब्यात देण्यात आली.
दरम्यान, महाकाली सहकारी गृहनिर्माण संस्थेतील सात झोपड्या प्रकल्पाला अडथळा ठरत होत्या. एमएमआरडीएच्या मागणीवरून त्या झोपड्यांचे निष्कासन करण्यात आले असून ती जागाही प्रकल्पाकरिता हस्तांतरित करण्यात आली आहे.
या कारवाईनंतर प्रकल्पाची अंमलबजावणी अधिक वेगाने होण्यास मदत होणार असल्याचे प्रशासनाकडून सांगण्यात आले.
