कोपरगाव, दि.१९ ( दिपक साटोटे )
कोपरगांव कृषि उत्पन्न बाजार समितीतील बोगस व भ्रष्ट कारभारासंदर्भातील गंभीर तक्रारींची चौकशी करण्याचे आदेश नाशिक जिल्ह्यातील सहकारी संस्थांच्या सहाय्यक निबंधक कार्यालयाकडून देण्यात आले आहेत. सहाय्यक निबंधक, सहकारी संस्था, येवला यांच्या आदेशानुसार गठीत चौकशी पथक,२० जून २०२५ रोजी सकाळी ११ वाजता कोपरगांव बाजार समितीच्या कार्यालयात प्रत्यक्ष भेट देणार आहे.
काँग्रेस नेते विजय जाधव यांनी सादर केलेल्या तक्रारीमध्ये बाजार समितीच्या कार्यपद्धतीत गंभीर त्रुटी व आर्थिक अनियमिततेचा आरोप करण्यात आला होता. त्यानंतर या प्रकरणाची सखोल चौकशी करण्यासाठी पुन्हा सहाय्यक निबंधक विजयसिंग राजपूत यांच्या नेतृत्वाखाली पथकाची स्थापना करण्यात आली.
संबंधित चौकशीसाठी बाजार समितीला मूळ अभिलेख, लेखी पुरावे आणि सचिवांचे स्पष्टीकरण सादर करण्याचे आदेश देण्यात आले आहेत. तसेच संबंधित सचिवांना चौकशी पूर्ण होईपर्यंत सक्तीच्या रजेवर पाठवण्यात येणार असल्याची माहितीही समोर आली आहे.
तक्रारदार जाधव यांना सुध्दा या दिवशी समितीच्या कार्यालयात प्रत्यक्ष उपस्थित राहण्याचे निर्देश देण्यात आले आहेत. प्रशासनाकडून या चौकशी प्रक्रियेकडे गांभीर्याने पाहिले जात असून, लवकरच या प्रकरणातील सत्य बाहेर येण्याची शक्यता वर्तवली जात आहे.
