कोपरगांव, दि. १० : चंद्रकांत जोर्वेकर
कोपरगांव तालुक्यातील श्री राष्ट्रसंत प.पु. जनार्दन स्वामी (मौनगिरी) महाराज समाधी मंदिर, कोपरगांव-बेट येथे महाशिवरात्र निमित्त दि. ११ फेब्रुवारी ते १६ फेब्रुवारी दरम्यान विविध धार्मिक कार्यक्रमांचे आयोजन करण्यात आले आहे.
या परंपरागत धार्मिक सोहळ्याचा भाविकांनी मोठ्या संख्येने लाभ घ्यावा, असे आवाहन मठाधीश प.पु. स्वामी रमेशगिरीजी महाराज यांनी केले आहे. या कालावधीत सत्संग, प्रवचन व भक्तीमय संगीत कार्यक्रमांचे आयोजन करण्यात आले असून, प्रसिद्ध प्रवचनकार शिवभक्त भाऊ पाटील (त्र्यंबकेश्वर) यांचे प्रवचन तसेच ह.भ.प. दत्ता महाराज वैद्य (निफाड) यांचे भक्तीमय संगीत शिवभक्तांना अनुभवता येणार आहे.
हा महाशिवरात्र निमित्त धार्मिक सोहळा श्री संत सद्गुरू जनार्दन स्वामी (मौनगिरी) महाराज समाधीस्थान व श्री काशीविश्वनाथ महादेव शैक्षणिक व गोपाल ट्रस्ट यांच्या संयुक्त विद्यमाने साजरा होणार आहे. प.पु. स्वामी रमेशगिरीजी महाराज (विश्वस्त) यांच्या मार्गदर्शनाखाली या कार्यक्रमांचे आयोजन करण्यात आले आहे.
या प्रसंगी दत्तात्रेय बाळकृष्ण होळकर (अध्यक्ष), विलास यादराव कोते (उपाध्यक्ष), अंबादासदादा अंत्रे (सचिव), त्र्यंबक कृष्णाजी पाटील यांच्यासह अनिल आप्पासाहेब जाधव, अशुतोष विलासराव पानगव्हाणे, संदीप मोहनराव चव्हाण, अतुल बाबुराव शिंदे, शिवनाथ सुभाषराव शिंदे, मिलनकुमार दौलतराव चव्हाण आदी मान्यवर उपस्थित राहणार आहेत.
