पोलिसांच्या आश्वासनानंतर आंदोलन स्थगित
कोपरगाव : दिलीप गायकवाड
कोपरगाव शहरातील खंदक नाला परिसरातील सार्वजनिक रहदारीच्या रस्त्यावर अनधिकृत गॅरेज उभारून वाहतुकीस अडथळा निर्माण होत असल्याचा आरोप करत सामाजिक कार्यकर्ते मयुर आव्हाड यांनी शुक्रवारी कोपरगाव पोलीस ठाण्यासमोर धरणे आंदोलन सुरू केले. मात्र, पोलीस प्रशासनाने कारवाईचे आश्वासन दिल्यानंतर हे आंदोलन स्थगित करण्यात आले.
आव्हाड यांनी यापूर्वीच कोपरगाव शहर पोलीस निरीक्षकांकडे तक्रार निवेदन देऊन संबंधित अनधिकृत गॅरेज व मालकावर एका आठवड्यात कारवाई करण्याची मागणी केली होती. अन्यथा पोलीस ठाण्यासमोर धरणे आंदोलन करण्यात येईल, असा इशाराही त्यांनी दिला होता. मात्र, मुदतीत कोणतीही कारवाई न झाल्याने त्यांनी ६ जून रोजी भर उन्हात पोलीस ठाण्यासमोर आंदोलन सुरू केले.
या आंदोलनाची दखल घेत पोलीस निरीक्षक रामकृष्ण कुंभार यांनी प्रकरणाची चौकशी करून आवश्यक कारवाई करण्यात येईल, असे आश्वासन दिले. त्यानंतर आव्हाड यांनी आंदोलन स्थगित करण्याची घोषणा केली.
दरम्यान, या विषयासंदर्भात आव्हाड यांनी कोपरगाव नगरपरिषदेचे मुख्याधिकारी, तहसीलदार, जिल्हाधिकारी (अहिल्यानगर), कोपरगावचे आमदार तसेच विधान परिषदेच्या आमदारांनाही निवेदने दिली असल्याची माहिती आव्हाड यांनी बहुजन शक्ती न्युज’ला दिली आहे.
