मुंबई, दि. २५ (अजय मगरे)
अखिल भारतीय मराठी पत्रकार परिषदेच्या ४४ व्या द्वैवार्षिक अधिवेशनाच्या पार्श्वभूमीवर मुंबईत महत्त्वपूर्ण हालचालींना वेग आला आहे. लातूर जिल्ह्यातील उदगीर येथे २०२६ मध्ये होणाऱ्या या अधिवेशनाच्या नियोजनासाठी बुधवारी (दि. २५ मार्च) मुंबईतील परिषदेच्या मुख्य कार्यालयात महत्त्वाची बैठक पार पडली.
या बैठकीत अधिवेशनाच्या सर्वांगीण नियोजनाबाबत सविस्तर चर्चा करण्यात आली. अधिवेशन यशस्वी करण्यासाठी प्रतिनिधी नोंदणी, तांत्रिक सुविधा, तसेच संघटनात्मक तयारी यावर विशेष भर देण्यात आला. मुंबई विभागाकडून दिल्या जाणाऱ्या जबाबदाऱ्या आणि सहकार्याबाबतही यावेळी स्पष्ट रूपरेषा निश्चित करण्यात आली.
बैठकीस परिषदेचे मुख्य विश्वस्त श्री. एस. एम. देशमुख व विश्वस्त शरद पाबळे यांनी मार्गदर्शन केले. तसेच अध्यक्ष मिलिंद आष्टीकर, मुंबई अध्यक्ष राजा आदाटे, उपाध्यक्ष विशाल परदेशी, विभागीय सचिव दीपक कैतके, मुंबई सचिव दीपक पवार, उमेश शेट्ये व गणेश के. जगताप हे पदाधिकारी उपस्थित होते.
यावेळी विश्वस्त एस. एम. देशमुख यांनी मार्गदर्शन करताना सांगितले की, उदगीर येथील हे अधिवेशन मराठी पत्रकारितेच्या दृष्टीने ऐतिहासिक ठरणार असून पत्रकारांच्या विविध प्रश्नांवर ठोस दिशा देणारे व्यासपीठ ठरेल.
मुंबईतील पदाधिकाऱ्यांवर सोपवण्यात आलेल्या जबाबदाऱ्यांमुळे अधिवेशनाची तयारी आता अंतिम टप्प्यात पोहोचत असून, संपूर्ण राज्याचे लक्ष उदगीरकडे लागले आहे.
