सांची धनसरेने मिळवले दहावीत ९५.४० टक्के गुण.
मुंबई , दि १३ ( प्रतिनिधी )
चेंबूरच्या सिद्धार्थ कॉलनीत राहणारी आणि आदर्श विद्यालयात शिकणारी सांची अनंत धनसरे हिने इ. १० वीच्या परीक्षेत ९५.४० टक्के गुण मिळवून आपल्या कुटुंबाचे तसेच शाळेचे नाव उज्ज्वल केले आहे. प्रतिकूल परिस्थितीतून आणि आर्थिक अडचणींवर मात करत मिळवलेले हे यश सर्वांना प्रेरणादायी ठरत आहे.
सांचीचे वडील अनंत धनसरे हे एका लघु दैनिकात पत्रकार म्हणून कार्यरत असून पुस्तक विक्री व प्रकाशन हे त्यांचे जोडधंदे आहेत. ते एक लेखक आणि जुन्या पुस्तकांचे संग्राहकदेखील आहेत. आई स्वाती ह्या गृहिणी असून संपूर्ण घर चालवण्याची जबाबदारी त्यांच्या खांद्यावर आहे.
घरची हलाखीची परिस्थिती, फी व वह्यापुस्तकांसाठी असलेली सततची धडपड, आणि आरोग्याची अडचण – अशा अनेक संकटांवर मात करत सांचीने १० वी मध्ये घवघवीत यश संपादन केले आहे. पायावर झालेली शस्त्रक्रिया आणि दीर्घकाळ एकाच जागी बसू न शकण्याची अडचण असतानाही तिने १५-१६ तास अभ्यास करून हे यश मिळवले आहे.
सांचीला लहानपणापासून वाचनाची व लेखनाची आवड आहे. तिने लिहिलेल्या कविता शाळेच्या वार्षिक पत्रिकेत प्रसिद्ध झाल्या आहेत. डॉ. बाबासाहेब आंबेडकर, तथागत बुद्ध, तसेच विज्ञान व प्रेरणादायी पुस्तकांचा अभ्यास ती करत असते. तिला भविष्यामध्ये चार्टर्ड अकाऊंटंट (CA) होण्याचे स्वप्न आहे.
“परिस्थितीशी झगडल्याशिवाय मार्ग सापडत नाही. रडत बसण्यापेक्षा प्रयत्न करत राहिले पाहिजे,” असे मत सांचीने व्यक्त केले.
सांचीच्या यशाने संपूर्ण परिसरात आनंदाचे वातावरण असून तिचे सर्व स्तरातून अभिनंदन केले जात आहे. तिच्या पुढील वाटचालीसाठी अनेकांनी शुभेच्छा दिल्या आहेत.
