मुंबई : मंगेश म्हात्रे
वर्षानुवर्षे हक्काच्या घराच्या प्रतीक्षेत असलेल्या संक्रमण शिबिरातील रहिवाशांना दिलासा देणारा निर्णय म्हाडा कडून घेण्यात आला आहे. ‘मास्टर लिस्ट’च्या माध्यमातून पात्र भाडेकरूंना कायमस्वरूपी घरे उपलब्ध करून देण्यासाठी ऑनलाईन अर्ज प्रक्रिया १ मेपासून सुरू होणार आहे.
म्हाडाच्या इमारत दुरुस्ती व पुनर्रचना मंडळाकडून (आर.आर. बोर्ड) ही प्रक्रिया राबविण्यात येत आहे. मध्य मुंबईतील अनेक उपकरप्राप्त इमारती अरुंद भूखंड, आरक्षण किंवा रस्ता रुंदीकरणामुळे पुनर्विकासासाठी अपात्र ठरल्या आहेत. तसेच काही ठिकाणी पुनर्रचना होऊनही गाळ्यांची संख्या अपुरी पडल्याने अनेक मूळ भाडेकरू वंचित राहिले. अशा रहिवाशांना या उपक्रमामुळे मोठा दिलासा मिळण्याची शक्यता आहे.
ही अर्ज प्रक्रिया १ मे २०२६ रोजी सकाळी १० वाजल्यापासून सुरू होऊन २० मे २०२६ रोजी रात्री ११.५९ वाजेपर्यंत सुरू राहणार आहे. इच्छुकांनी म्हाडाच्या अधिकृत संकेतस्थळावरील ‘सिटीझन कॉर्नर’मधील Application for Masterlist या पर्यायाद्वारे नोंदणी करून अर्ज सादर करावा. नोंदणीदरम्यान वापरलेल्या ई-मेल आयडी व पासवर्डच्या साहाय्याने लॉगिन करून अर्ज भरता येणार असून आवश्यक मार्गदर्शक सूचना संकेतस्थळावर उपलब्ध आहेत.
दरम्यान, यापूर्वी बृहतसूचीत पात्र ठरलेल्या अर्जदारांनी पुन्हा अर्ज करू नये, तर ऑफलाईन अर्ज प्रलंबित असलेल्या अर्जदारांनी नव्याने ऑनलाईन अर्ज करणे आवश्यक आहे. अर्ज सादर केल्यानंतर ३० दिवसांच्या आत संबंधित कागदपत्रे प्रत्यक्ष कार्यालयात जमा करणे बंधनकारक राहणार आहे. तसेच सुनावणीवेळी सर्व मूळ कागदपत्रे सादर करावी लागतील, असे उपमुख्य अधिकारी लक्ष्मण मुंढे यांनी स्पष्ट केले.
