ठाणे, दि.३ : अजय मगरे
आगामी ठाणे महानगरपालिकेच्या निवडणुकीच्या पार्श्वभूमीवर वागळे इस्टेट विभागातील प्रभाग क्रमांक १७ मध्ये राजकीय हालचालींना वेग आला आहे. या प्रभागात विविध पक्षांचे मातब्बर उमेदवार रिंगणात उतरल्याने निवडणूक रंगतदार आणि चुरशीची ठरण्याची चिन्हे आहेत.
प्रभाग क्रमांक १७-अ मध्ये राजकीय चित्र स्पष्ट झाले असून एकता भोईर या बिनविरोध निवडून आल्या आहेत. दोन अपक्ष उमेदवारांनी माघार घेतल्यामुळे हा मार्ग मोकळा झाला. त्यामुळे या प्रभागात कोणतीही लढत न होता निकाल निश्चित झाला आहे.
मात्र प्रभाग क्रमांक १७-ब मध्ये खरी राजकीय लढत पाहायला मिळणार आहे. येथे
पूजा किरण ढमाळ (मनसे),
संध्या सुनील मोरे (शिवसेना) आणि
पूजा सुरेश मोरे (वंचित बहुजन आघाडी)
यांच्यात थेट सामना रंगणार असून तिन्ही पक्षांनी जोरदार तयारी सुरू केली आहे.
प्रभाग क्रमांक १७-क मध्ये बहुपक्षीय लढत होत असून
सागर गंगाराम खरात (शिवसेना – उबाठा),
प्रभात विभूती झा (काँग्रेस),
प्रकाश संभाजी शिंदे (शिवसेना) आणि
अनिकेत बंडू मोरे (वंचित बहुजन आघाडी)
हे उमेदवार मैदानात आहेत. या प्रभागात मतांचे विभाजन कोणाच्या बाजूने होणार, याकडे राजकीय वर्तुळाचे लक्ष लागले आहे.
तसेच प्रभाग क्रमांक १७-ड मध्येही लढत तितकीच चुरशीची असून
सुखदेव उबाळे (शिवसेना – उबाठा),
योगेश जानकर (शिवसेना) आणि
राधाकिशन (राजू) डावरे (वंचित बहुजन आघाडी)
यांच्यात थेट सामना होणार आहे.
एकूणच प्रभाग क्रमांक १७ मध्ये शिवसेनेचे दोन्ही गट, मनसे, काँग्रेस आणि वंचित बहुजन आघाडी यांच्यात प्रतिष्ठेची लढाई रंगली असून वागळे इस्टेट विभागातील ही निवडणूक ठाणे महापालिकेच्या राजकारणाची दिशा ठरवणारी ठरण्याची शक्यता वर्तवली जात आहे.
