अंबरनाथ दि. १२ ( अजय मगरे )
अंबरनाथ नगरपालिका कार्यालयात आज मुंबई महानगर प्रदेश झोपडपट्टी पुनर्वसन प्राधिकरण, ठाणे आणि अंबरनाथ-बदलापूर विकासक व वास्तूविशारद संघटनेच्या संयुक्त विद्यमाने झोपडपट्टी पुनर्वसन विषयक जाणीवजागृती कार्यशाळेचे आयोजन करण्यात आले. या कार्यशाळेत विकासक, वास्तूविशारद आणि संबंधित अधिकाऱ्यांनी सहभाग घेतला.
या प्रसंगी मुंबई महानगर प्रदेश झोपडपट्टी पुनर्वसन प्राधिकरण, ठाणे चे मुख्य कार्यकारी अधिकारी पराग सोमण, सक्षम प्राधिकारी ठाणे-२ चे प्रशांत जोशी, कार्यकारी अभियंता राजकुमार पवार, सहाय्यक निबंधक सहकारी संस्था रोहिदास बांगर, अंबरनाथ-बदलापूर विकासक व वास्तूविशारद संघटनेचे अध्यक्ष संजय जाधव, अंबरनाथचे माजी नगराध्यक्ष सुनील चौधरी, अंबरनाथ पालिकेचे उपमुख्य कार्यकारी अधिकारी उमेश राऊत, तसेच उपअभियंता प्रशांत पवार आणि संघटनेचे सदस्य उपस्थित होते.
कार्यशाळेत शहरातील झोपडपट्टी पुनर्वसन योजना प्रभावीपणे कशा राबविता येतील, या विषयावर चर्चा करण्यात आली. विकासकांनी आपल्या शंका आणि अडचणी मांडल्या, तसेच त्यासंदर्भात अधिकाऱ्यांनी समाधानकारक उत्तरे दिली.
मुख्य कार्यकारी अधिकारी पराग सोमण यांनी आपल्या मार्गदर्शनपर भाषणात अंबरनाथ-बदलापूर परिसरातील वास्तूविशारद आणि विकासकांनी झोपडपट्टी पुनर्वसनासाठी पुढाकार घ्यावा, असे आवाहन केले. तसेच शासनाकडून सर्वतोपरी सहकार्य केले जाईल, असे आश्वासनही त्यांनी दिले.
कार्यक्रमाचे सूत्रसंचालन श्रीमती किमया पवार यांनी केले. कार्यशाळेच्या यशस्वी आयोजनाबद्दल सर्व संबंधितांकडून समाधान व्यक्त करण्यात आले.
