ठाणे , दि १६ ( अजय मगरे )
राज्य शैक्षणिक संशोधन व प्रशिक्षण परिषद, महाराष्ट्र राज्य, जिल्हा शिक्षण व प्रशिक्षण संस्था, ठाणे आणि ठाणे महानगरपालिका शिक्षण विभाग यांच्या संयुक्त विद्यमाने STARS प्रकल्पाअंतर्गत शाळा पूर्व तयारी मेळावा मोठ्या उत्साहात पार पडला.
हा मेळावा ठा.म.न.पा. शाळा क्र. १३० व १३१, काजूवाडी, ठाणे येथे आयोजित करण्यात आला होता. शाळा पूर्व शिक्षणावर भर देत बालकांच्या समग्र विकासासाठी आवश्यक शिक्षणपद्धती व उपक्रमांचे प्रत्यक्ष सादरीकरण करण्यात आले. मुलांच्या बौद्धिक, सामाजिक, भावनिक व शारीरिक विकासासाठी हा मेळावा अत्यंत उपयुक्त ठरला.
या कार्यक्रमात पालक, शिक्षक, सी.आर.सी. समन्वयक आणि विद्यार्थी मोठ्या संख्येने उपस्थित होते. STARS प्रकल्पाच्या माध्यमातून बालवर्ग शिक्षणाचा दर्जा उंचावण्याचा आणि मुलांना शाळेच्या वातावरणाशी परिचित करून देण्याचा प्रयत्न यामध्ये दिसून आला.
या उपक्रमामुळे नव्याने शाळेत दाखल होणाऱ्या विद्यार्थ्यांमध्ये आत्मविश्वास वाढण्यास मदत होणार असून, शिक्षण प्रक्रियेची भीती कमी होऊन शाळेप्रती आकर्षण निर्माण होईल, असा विश्वास उपस्थित मान्यवरांनी व्यक्त केला. विशेषतः CBSE आधारित पहिलीतील वर्ग व डिजिटल शिक्षणामुळे विद्यार्थ्यांना उत्तम शैक्षणिक वातावरण लाभत असल्याचे पालकांनी नमूद केले.
या मेळाव्याचे यशस्वी आयोजन ठाणे मनपा शाळा क्र. १३० व १३१ काजूवाडीच्या प्रभारी मुख्याध्यापिका सौ. मीना बलकवडे व सौ. पुष्पा सिंग तसेच सीआरसी समन्वयक सौ. सुवर्णा निकम यांच्या मार्गदर्शनाखाली पार पडले.
